DokuFest, më i plotë dhe më i larmishëm

DokuFest ka krijuar një traditë mbi 12-vjeçare, me një reputacion gjithmonë e në rritje. Por, këtë vit, sipas organizatoreve, festivali ndërkombëtar i filmave me metrazh të shkurtër dhe atyre dokumentarë që zhvillohet çdo vit në Prizren do të vijë edhe më i plotë e i larmishëm.

Filma nga mbi 60 shtete do të shfaqen gjate një jave të mbushur edhe me aktivitete të tjera në kuadër të këtij evenimenti.

Do të ndahen gjithsej nëntë çmime, ndër të cilat ai për prodhimin më të mirë ballkanik dhe një film i përzgjedhur nga publiku.

Ky edicion shënon edhe pjesëmarrjen më të lartë të prodhimeve shqiptare në historinë e DokuFest, me 13 filma në konkurrim dhe të tjerë jashtë garës.

Gjithashtu, disa prej prodhimeve me të veçanta botërore të kohëve të fundit do të jenë pjesë e programit te festivalit, i cili do të zgjasë nga data 17 deri ne 25 gusht.

Vend të veçantë do të zërë konkurrimi i filmave për fëmijë e të rinj, si dhe atyre nga vendet nordike me 40 filma pjesëmarrës. Mbi 200 producentë dhe prodhues filmash kanë konfirmuar pjesëmarrjen e tyre në këtë aktivitet. /TCH/