Ditë fantastike për Donald Trumpin: Tri gjëra të mira për ish-presidentin amerikan

Donald Trump ka pasur deri më tani ditën më të mirë në vitin 2024, shkruan CNN dhe rendit tri gjërat e mira që i kanë ndodhur ish-presidentit amerikan, të cilat mund ta ndihmojnë dukshëm në garën e ardhshme për Shtëpinë e Bardhë.

Kujtesa e Bidenit dhe fshehja e dokumenteve të klasifikuara

Ish-presidenti mori një dhuratë politike nga një hetim në të cilin këshilltari i posaçëm i Departamentit të Drejtësisë, Robert Hur zbuloi se presidenti amerikan, Joe Biden mbante në mënyrë të paligjshme dokumente të klasifikuara në lidhje me ushtrinë dhe politikën e jashtme në Afganistan pasi shërbeu si zëvendëspresident. Prokurori arriti në përfundimin se Biden keqpërdori qëllimisht dokumente konfidenciale dhe se për shkak të kujtesës së dobët ishte e pamundur ta dënonin. Ai tha gjithashtu se Biden nuk e mbante mend se në cilën datë i vdiq djali i tij.

Edhe pse Biden u mbrojt kundër këtyre akuzave në konferencën e mbrëmshme për shtyp, duke thënë se ai “nuk ka probleme me kujtesën”, kjo sigurisht që do të jetë një argument në duart e Trumpit dhe mbështetësve që do të kujtojnë hipokrizinë e Bidenit për një rast të ngjashëm me Trumpin dhe dokumentet konfidenciale. Kritika e gjendjes psikofizike të presidentit aktual është një tjetër fushë ku do të insistojë ish-udhëheqësi.

Nominimi republikan

Një tjetër gjë e mirë për Trumpin është një rrugë e sigurt drejt nominimit republikan. Trump vazhdoi serinë e fitores edhe në Nevada dhe aktualisht nuk ka pothuajse asnjë indikacion që kandidatja e vetme republikane e mbetur, Nikki Haley, mund të befasojë dhe t’i bëjë zgjedhjet paraprake republikane të pasigurta.

Haley tha se do të qëndrojë në garë të paktën deri në të ashtuquajturën “Super e Marta” në fillim të muajit mars, edhe pse sondazhet tregojnë se ajo po humb bindshëm ndaj Trumpit në shtetin e Karolinës së Jugut. “Super e Marta” do të mbahet më 5 mars dhe në atë ditë 15 shtete federale shkojnë në votime dhe përfaqësojnë një numër të madh delegatësh të rëndësishëm për marrjen e nominimit, që do të jetë kështu shansi i fundit i Haleyt për t’u rikthyer në garë.

Po i buzëqesh fitorja në Gjykatën e Lartë

Edhe pse fitorja në Gjykatën e Lartë pas seancës së djeshme mund të mos jetë aq e sigurt sa në zgjedhjet partiake, Trump mund të jetë i kënaqur me mënyrën se si duken gjërat tani.

Edhe gjyqtarët liberalë ishin skeptikë se Colorado mund ta shpallte ‘rebel’ ish-presidentin dhe ta diskualifikonte atë nga gara zgjedhore.

Pyetja nëse Trump ishte me të vërtetë i përfshirë në kryengritje pothuajse nuk u përmend gjatë seancave, një shenjë se gjyqtarët mund të anashkalojnë ndikimin e ish-presidentit mbi kryengritësit më 6 janar të vitit 2021 dhe të lejojnë që emri i tij të shfaqet në fletëvotim.

Megjithatë, çështje më të mëdha në lidhje me Trumpin po ngrihen para Gjykatës së Lartë, kryesisht çështja e imunitetit nga ndjekja penale. Javën e kaluar, një gjykatë në Uashington, DC vendosi se Trumpi nuk ka imunitet nga ndjekja penale.

Nëse Gjykata e Lartë do të deklarohej pa juridiksion dhe do të vendoste t’ia linte çështjen një gjykate në Uashington, 77-vjeçari mund të ishte në telashe. Por, nëse vendosin ta diskutojnë vetë këtë çështje dhe duke marrë parasysh shumicën konservatore në përbërje të gjykatës, mund të jetë një arsye tjetër për të festuar Donald Trump. /Telegrafi/