Dhunë në hendboll

Erdhën për ta përkrahur skuadrën e tyre të zemrës, por për të hyrë në palestrën prishtinase u deshtë që së pari të përballen me tifozërinë vendase. ‘Ujqit’ nga Ferizaj u sulmuan nga tifozët ‘bardhekaltër’ ‘Plisat’ me të arritur në parkingun e Palestrës së Sporteve në kryeqytet, para ndeshjes derbi në elitën e hendbollit kosovar, Prishtina-Kastrioti.

Zënka përfshiu afro 200 tifozë, teksa dy prej tyre u shtrinë në Qendrën Klinike Universitare të Kosovës. Zëdhënësja e Policisë së Kosovës për rajonin e Prishtinës, Sabrie Kamberi konfirmoi për Arena incidentin mes tifozëve, teksa u shpreh se dy tifozët e lënduar janë ndalur për intervistim në stacionin policor.

“Para ndeshjes së hendbollit mes Prishtinës dhe Kastriotit, në parkingun e Pallatit të Rinisë dhe Sporteve ka ndodhur një rrahje mes dy tifozërive. Aty kanë qenë pjesëmarrës afër 200 persona dhe dy prej tyre janë lënduar më rëndë. Të dy janë shtrirë në spital dhe më pas do të intervistohen të dy. Një nga të lënduarit ka qenë nga Ferizaj, ndërsa tjetri nga Prishtina”, u shpreh Kamberi. /Tribuna/Telegrafi/