Dhjetë të vdekur pas zjarrit që shpërtheu në qendrën stërvitore të Flamengos

Një zjarr i madh ka shpërthyer në kompleksin stërvitor të një prej klubeve më të mëdha braziliane, Flamengo, e ku kanë mbetur të vdekur 10 persona me tre të tjerë që janë lënduar.

Ekipe të shumta zjarrëfikësish u thirrën në ndihmë pas orës pesë të mëngjesit në qendrën stërvitore Ninho de Urubu të klubit të Flamengos që gjendet në Rio de Janeiro.

Ende nuk dihen shkaqet e zjarrit.

Ende nuk ka të dhëna për moshën dhe identitetin e të lënduarve, por ata që kanë humbur jetën janë 14, 15 dhe 16 vjeçarë.

Të lënduarit u dërguan në spitalin më të afërt lokal me gjendjen e tyre që ende nuk dihet nëse është jashtë rrezikut për jetë.

Mediat vendase raportojnë se zjarri filloi në konviktin ku lojtarët flejnë.

Pamjet nga ajri të Globo TV shfaqin tymin e madh duke dalur nga ndërtesa në fjalë.

Flamengo ka një program të zhvillimit të të rinjve për lojtarët e rinj premtues në moshën e hershme të tyre. Shumë lojtarë jetojnë në kompleks i cili ka edhe konviktin teksa stërviten në akademi të klubit. /Telegrafi/