Dhembja e Kosovës, përmes fotografive të Spahisë (Foto)

Fotografi i mirënjohur nga Kosova, Fahredin Spahija, me punimet e tij merr pjesë në konkursin e fotografive “One Life”. Përmes një serie të fotografive, ai ka tentuar ta pasqyrojë dhembjen e familjarëve të të zhdukurve, gjatë luftës së fundit në Kosovë.

“Gjatë luftës së fundit në Kosovë, agresioni serb ka shkaktuar dëme të pariparueshme. Por, dëmi më e dhimbshëm është zhdukja tremijë personave si pasojë e gjenocidit etnik kundër shqiptarëve në Kosovë. Një numër i madh i tyre, sot, pas 14 vjetësh, nuk janë gjetur ende dhe kjo përkeqëson edhe më shumë situatën. Kjo është një situatë vërtet e vështirë, sidomos për familjet e të zhdukurve, por edhe për pjesën tjetër të kombit. Një pjesë të artit fotografik ia kam përkushtuar kësaj teme të dhimbshme dhe tragjike, duke realizuar projektin fotografik ‘Missing’”, ka shkruar Spahija në profilin e tij në “One Life”, që i dedikohet garës ndërkombëtare të fotografisë.

Fituesi i kësaj gare, përcaktohet nga numri i votuesve.

“Qëllimi im kryesor ishte që ta pasqyroj dhimbjen dhe gjendjen e rënd të familjarëve të të zhdukurve”, ka thënë Spahija për Telegrafin.

Për ta përçuar këtë mesazh sa më fuqishëm në botë, të interesuarit mund të votojnë këtu. /Telegrafi/