Dhe humbja erdhi…

Peja ka pësuar humbje kundër skuadrës rumune Craiova, me rezultat 85-75, pas katër fitoresh rresht në Ligën Ballkanike.

Rumunët e nisën furishëm çerekun e parë, pasi që kishin edhe përkrahjen e rreth 1500 shikuesve të tyre, mirëpo pejanët nuk i lejuan shumë hapësira dhe arritën ta mbajnë lojën nën kontroll, duke e mbyllur këtë çerek me vetëm një pikë disavantazh, 20-19.

Çereku i dytë u përshkua me ndryshime të shpeshta në rezultat, me pejanët që bënin përpjekje të vazhdueshme për ta kontrolluar lojën, mirëpo gabimet në sulm dhe mospërqëndrimi në mbrojtje i kushtuan me ngritje të disavantazhit në 6 pikë, 49-43.

Edhe pas pushimit të pjesës së parë, pejanët nuk arritën ta gjejnë rrugën për t’i ndalur vendasit rumunë, të cilët ishin shumë efikas në aksionet e tyre e sidomos në kundërsulmet e shpejta nga dyshja, Bureau e Seals. Ky çerek përfundoi me 10 pikë epërsi për Craiovan, 68-58.

Në çerekun e fundit ndeshja u dramatizua shumë. Së pari u përjashtua nga ndeshja gjiganti Popescu i Craiovas, i cili i dha mundësi pejanëve ta zvogëlojnë epërsinë në vetëm 4 pikë, mirëpo në çastet vendimtare të ndeshjes verdhezinjtë u treguan anemikë dhe nuk arritën ta shmangin humbjen e gjashtë në Ligën Ballkanike me rezultat, 85-75.

Pas kësaj humbje Peja mbetet në pozitën e pestë me 18 pikë, po aq sa ka edhe Galil Gilboa në pozitën e katërt. /Telegrafi/