Dardanët: Siç e kemi traditë, nuk do të ofendohet kundërshtari

Kosova do të luajë të hënën ndeshjen e rëndësishme për kualifikimet në Euro 2020 ndaj Malit të Zi.

Ky takim pritet të jetë mjaft i rëndësishëm për Kosovës pasi që me fitore do të mbante gjallë shpresat për kualifikime.

Tifozët e Kosovës që njihen si ‘Dardanët’ sot kanë lëshuar një njoftim të rëndësishëm për anëtarët e tyre.

‘Dardanët’ pos tjerash kanë shkruar se nuk do ta ofendojnë kundërshtarin.

Më poshtë njoftimi i plotë i tyre

Të hënën me 14 tetor, në stadiumin ‘Fadil Vokrri’, Kosova përballet me Malin e Zi, ndeshje kjo që mund të jetë vendimtare për rrugëtimin e Kosovës në Euro2020.

Me besimin në fitore, ne Dardanët, do t’i përkrahim djelmoshat tanë prej sekondës së parë e deri në fund.

Me besimin se kështjella e quajtur ‘Fadil Vokrri’ mbetet e pamposhtur, ne do të jemi lojtari i 12-të i Kosovës.

Me besimin në djemtë tanë në krye me Challandes, nuk do të ndalemi së brohorituri. Njëkohësisht, siç e kemi traditë, nuk do ta ofendojmë kundërshtarin.

Kemi dhënë besën. Për Kosovën, dashurinë tonë të përjetshme. Të gjithë anëtarët e tifo-grupit ftohen të tërheqin biletat e tyre deri ditën e diele. Biletat janë vetëm për anëtar.

/Telegrafi/