Çka ka Trepça’89 që ankohet?

Sikur është bërë dukuri që pas çdo ndeshje të humbur, drejtuesit e skuadrave tona të shprehin pakënaqësinë dhe të ankohen te komisari i garave. Në shumicën e rasteve këtë e bëjnë për shkak të vendimeve të gjyqtarëve, por ka edhe raste të tjera pas të cilave kërkohet që të anulohet ndeshja, apo ajo të fitohet në tavolinën e gjelbër.

Ankesat e tilla kanë rënë në sy veçmas nga Trepça’89, e cila ende pa përfunduar faza e parë e garave, tashmë është ankuar dy herë, por që duket e nuk ka fat, apo më mirë të thuhet drejtësia nuk është në anën e “minatorëve”.

Ajo sezonin e bërë me vend apo vend ishte njëra prej skuadrave që më së shumti ishte ankuar në elitën e futbollit kosovar. Komisari i Superligës, Ismet Ahmeti, ka refuzuar ankesën e Trepçës ’89 për ndeshjen me Ferizajn, kështu që nuk ka ndryshim dhe pikët e fituara në fushë i mbeten Ferizajt. Është ky rasti i dytë që skuadra mitrovicase ankohet pas ndeshjes së humbur në fushë, dhe në të dy rastet del se ankesa nuk është e bazuar në fakte, të paktën sipas komisarit.

“Po, është ankesa e dytë e Trepçës’89 këtë sezon, por që unë veproj sipas rregullores dhe nuk ka dyshim se të dy ankesat nuk janë bazuar në fakte. Në rastin e parë Trepça’89 është ankuar për ndeshjen me Prishtinës e cila ishte ndërprerë për disa minuta pas hedhjes së gazit lotsjellës, por ne kemi kërkuar edhe raportin nga policia.

Në rastin e dytë, skuadra mitrovicase është ankuar për shkak se trajneri i portierëve të Ferizajt, Jeton Bislimi, ka qëndruar në bankinë. Është e vërtetë se ai ka qenë i dënuar, por dënimi ka qenë me 250 euro, e jo me ndeshje, ndërkohë që për individ pagesa bëhet edhe me këste e ai e ka bërë këtë në kohën e duhur, kështu që ankesa nuk është e bazuar në fakte dhe si e tillë është refuzuar”, tha komisari Ismet Ahmeti, sipas të cilit trajneri i portierëve nuk ka ndikuar në epilogun e ndeshjes dhe humbjen e Trepçës’89.

Ky vendim duket se i ka irrituar drejtuesit e Trepçës ’89, të cilët thonë se nuk do të ndalen, por do të shkojnë deri në fund, pasi janë të bindur se drejtësia është në anën e tyre. “Afati i pagesës së dënimit nga Jeton Bislimi ka qenë 15 ditë nga dita e shqiptimit të dënimit.

Ai këtë nuk e ka bërë. Unë si sekretar i klubit me 14 tetor aty nga ora 10:00 kam shkuar në federatë dhe kam kërkuar ta shoh faturën nëse është bërë pagesa apo jo. Kjo nuk më është mundësuar, madje është lajmëruar skuadra e Ferizajt për mundësinë e ankesës sonë kështu që Ferizaj e ka bërë pagesën me 14 tetor në ora 13:24, pra pas ankesës sonë.

Më pas mora vesh se FFK-ja ka bërë një marrëveshje me Ferizajn që pagesa të bëhet me këste dhe që kjo të përfundoi deri më 25 tetor”, thotë sekretari i KF Trepça ’89, Sadedin Morina, i cili ka paralajmëruar se hapi tjetër është ankesa në shkallën e dytë. “Do të ankohemi, së pari në shkallën e dytë e nëse nuk miratohet, do të shkojmë deri në fund, do të kërkojmë mbrojtjen e ligjshmërisë, pasi jemi të bindur se kemi të drejtë”, thotë Morina.

Kryetari i KF Trepça ’89 Abedin Zeka thotë se ka disa paqartësi këtu, të cilat dëshmojnë se gjërat nuk janë të pastra. “Vet kryetari i KF Ferizaj deklaron se pagesa është bërë moti, kurse në bazë të fakteve del se pagesën e ka bërë Ilaz Mjaku me 15 tetor, pra pas ankesës sonë. Mirëpo, përkundër faktit se sekretari ynë ka qenë ën FFK që nga ora 10:00, atij nuk iu është lejuar protokollimi i ankesës deri në ora 15:00, atëherë kur ishte e qartë se është bërë pagesa. Sa i përket shtyrjes së afatit të pagesës, mua komisari më ka thënë se askush nuk e ka bërë një kërkesë të tillë”, tha Zeka. /Zëri/Telegrafi/