Bunjaki: Ulëset e Rasundas ideale për Prishtinë

Edhe pas një viti, donacioni i dhuruar nga Federata e Futbollit e Suedisë për Federatën e Futbollit të Kosovës ka mbetur pa e parë dritën. Reflektorë, pajisje të zërimit, ulëse e shumë gjëra tjera ende qëndrojnë në depot në kryeqytet dhe Mitrovicë. Madje, së fundi u tha se ulëset e stadiumit Rasunda, nuk janë të përshtatshme për stadiumin e Prishtinës. Për këtë stadium u parapanë të vendosen rreth 10 mijë ulëse.

Mirëpo, kompania e kontraktuar nga Komuna e Prishtinës kishte konstatuar se ulëset nuk janë të përshtatshme, për çka edhe Federata e Futbollit e Kosovës kishte menduar t’i vendos ato në një stadium tjetër.Ardhja e përzgjedhësit të Përfaqësueses së Kosovës, Albert Bunjaku në Kosovë, ka bërë që ky konstatim i Kompanisë të ndryshojë.

“Unë isha sot në stadium me zyrtarë të klubit të Prishtinës, ku provuam edhe ulëset, të cilat janë tejet të përshtatshme për tribunat e këtij stadiumi. Vendosja e ulëseve është shumë e thjesht, madje stadiumi në Prishtinë është më i përshtatshëm se ai i Rasundas. Pas vendosjes së tyre, do të krijohet hapësirë e mjaftueshme mes shkallëve”, thekson Bunjaku. /Tribuna/Telegrafi/