Bunjaki: Kosova në vitin e parë të pranimit, e arrin evropianin ose botërorin

Prishtina – Drita dhe Ferizaj – Trepça, ishin dy ndeshjet që janë monitoruar nga përzgjedhësi i Përfaqësueses së Kosovës Albert Bunjaki i cili vikendin që lamë pas qëndroi në Kosovë për tu rikthyer nesër në Suedi, ku do të jetë pastaj prezent të martën në ndeshjen kualifikuese për botëror “Brazili 2014”, Suedi - Portugali.

Bunjaki ka dhënë fjalë miradije për futbollin kosovar, sipas të cilit, ka sinjale pozitive.

Në bisedë për gazetën “Zëri”, ai ka folur edhe për Përfaqësuesen e Kosovës, e në momentin që të pranohet është e gatshme të grumbullohet, madje qysh në kualifikimet e para, do të arrijë të kualifikohet në kampionatin botëror ose evropian.

“Në futbollin kosovar po shoh gjëra pozitive. E para sivjet është më atraktiv kemi 4-5 ekipe që po luftojnë për titull. Lojtarët në fushë janë shumë më korrekt ndërmjet veti, nuk reagojnë dhe nuk bëjnë skena të pahijshme.

Pastaj ajo që është shumë më e rëndësishme është se vrapimet në fushë janë më të mëdha dhe kemi aksione të ndërtuara edhe pse jo në atë nivelin që dëshirohet Ajo që duhet të përmirësohet gjithsesi, janë ndërprerjet e panevojshme që janë shumë të shpeshta”, tha ish trajneri i Kalmarit dhe Orebros, Albert Bunjaki.

“Për të pasur shikueshmëri më të madhe, duhet infrastruktura të përmirësohet. E pash që Prishtina kishte bërë shumë mirë më mbulimin, por aty duhet ende shumë punë, duke filluar nga banjo për shikues.

Siguria duhet të jetë në nivel që të iu mundësohet familjarëve të vinë nëpër stadium, përveç këtyre duhet të kemi edhe aktivitet tjera si muzikë lojë shpërblyese që e joshin shikuesin”, tha tekniku shqiptar, i cili më pas ka folur edhe për Përfaqësuesen e Kosovës.

“Ne e dimë që përfaqësuesja A është e bllokuar dhe nuk mund të kemi aktivitete derisa nuk marrim ndonjë sinjal pozitiv. Bisedimet kanë filluar dhe unë po besoj që do të sjellin rezultate të mira. Ajo që unë mund të them është se Kosova është e gatshme dhe në momentin kur të marrim sinjalin ne mund të grumbullohemi. Kur të jemi të lirë të luajmë, edhe për mua është më lehtë t’i ftoj lojtarët, klubet atëherë nuk do të mund të më bëjnë probleme”, tha ai, sipas të cilit, futbollistët kosovarë që po luajnë nëpër Evropë janë garancion që Kosova ka të ardhme të mirë.

“Jam shumë i kënaqur me atë që po tregojnë të rinjtë tanë nëpër Evropë. Jemi të fokusuar te lojtarët e rinj 17-18 vjeç ku cilësia e tyre është e jashtëzakonshme, rastet e fundit janë ai Adnan Januzajt e Valon Berishës. Të tillë kemi shumë në Gjermani, Zvicër e Skandinavi. Unë e di ku janë ata, kam raporte të mira më ta dhe në momentin që pranohemi do t’i ftojmë. Unë me bindje them se qysh në kualifikimet e para, Kosova do të arrijë njërin prej kampionateve ose evropian ose botëror”, përfundoi Bunjaki. /Zëri/Telegrafi/