BERZH lë pa ndryshuar parashikimin për PBB-në e Shqipërisë: Ekonomia rritet 2.5 për qind këtë vit

Ekonomia e Shqipërisë do të rritet me 2.5% këtë vit sipas projeksioneve të vjeshtës të Bankës Europiane për Rindërtim dhe Zhvillim (BERZH) e cila la të pandryshuar parashikimin, njësoj si në raportin e pranverës 2023.

Ekonomia e vendit tonë u rrit me 2.7% në tremujorin e parë 2023, e nxitur nga kërkesa më e dobët, megjithëse inflacioni ishte në rënie. Eksportet e mallrave u tkurrën djeshëm, për shkak të uljes së kërkesës së jashtme dhe mbiçmimit të fortë të lekut.

Vlera e Lekut ishte 12% më e lartë në korrik 2023 se një vit më parë, duke arritur nivelin më të lartë të regjistruar, mbështetur nga numri më i madh i turistëve, si dhe prurje të vazhdueshme të remitancave dhe investimeve direkte.

BERZH analizoi se vlerësimi i monedhës kompensoi një pjesë të goditjes inflacioniste, çka mundësoi një politikë të përshtatshme monetare me një normë prej 3% deri në fund të gushtit 2023.

BERZH parashikon se rritja ekonomike pritet të vazhdojë me një ritëm mesatar prej 2.5% në 2023, duke pasur parasysh dobësitë dhe perspektivat e partnerit kryesor tregtar të Shqipërisë, Italisë, dhe inflacionin ende të lartë të ushqimeve, i cili po gërryen të ardhurat e disponueshme.

Nga ana tjetër, performanca jashtëzakonisht e fortë e sektorit të turizmit, ku numri i vizitorëve u rrit me 30% në vit në shtatë muajt e parë të vitit 2023, pritet të mbështesë rritjen si në afatshkurtër ashtu edhe afatmesëm.

Në përputhje me rimëkëmbjen e parashikuar globale, rritja ekonomike është parashikimi për t’u kthyer më pranë potencialit të saj, duke arritur 3.3% në 2024.

​Ekonomitë e Ballkanit Perëndimor u përballën me kërkesë të dobët në tregti me partnerët europianë, por kjo ishte kompensuar pjesërisht nga performanca e fortë e sektorit të turizmit në ekonomitë e bazuara në shërbime si Shqipëria, Mali i Zi dhe Kosova.

Rritja e PBB-së pritet të ngadalësohet më tej këtë vit, pasi partnerët kryesorë në Eurozonë kanë ritme të ngadalta rritjeje (me një parashikim i recesionit në Gjermani).

Nga ana tjetër, inflacioni, ndërsa ngadalësohet, vazhdon të jetë një taksë në konsumin familjar.

Ekonomitë në Ballkan po i drejtohen gjithnjë e më shumë tregut të jashtëm për financimin e borxhit, me Serbinë, Maqedoninë e Veriut dhe Shqipërinë që emetuan eurobono në gjysmën e parë të 2023, dhe Kosova, Maqedonia e Veriut dhe Serbia të angazhuar në programe financimi të vazhdueshme me Fondi Monetar Ndërkombëtar. /Telegrafi/