Bëhuni gati, “Final-Four” fillon sot

Kryeqyteti i Kosovës për dy ditë rresht do të jetojë me basketbollin. Pallati i Rinisë dhe Sporteve nga sonte pritet të jetë arenë e “nxehtë” e këtij sporti atraktiv.

Klubi më i suksesshëm në vendin tonë, Sigal Prishtina është organizatore e “Final-Four” të Ligës Ballkanike, eveniment ky që mbahet për herë të parë në vendin tonë.

Sigal Prishtina, Galil Gilboa, Levski dhe Balkan, do të jenë katërshja e madhe që do të kërkojnë trofeun e BIBL-së.

Pjesa përfundimtar e garave të Ligës Ballkanike do të nis me gjysmëfinalen e parë mes Levskit dhe Blakan në orën 17:30, ndërsa në orën 20:15, Sigal Prishtina do të sprovojë forcat me kampionin në fuqi, Galil Gilboa.

Trajneri i prishtinasve, Marin Dokuzovksi, ka thënë se pjesëmarrja e skuadrës së tij në “Final Four” është një sukses i madh.

“Unë e njoh mjaft mirë Ligën Ballkanike që nga krijimi i saj. Them se po bëhet më e mirë çdo herë. Vetë pjesëmarrja në ‘Final Four’ është një sukses i madh për Prishtinën. Mendoj se përparësia jonë më e madhe janë tifozët, të cilët e kanë përkrahur skuadrën në kohë të mira e të këqija”, ka thënë Dokuzovski.

Ndërsa, trajneri i Galil Gilboa, Sharon Drucker, tha se Balkan Liga po merr vëmendjen e tifozëve dhe ajo po shikohet çdo ditë e më shumë.

“Siç jam duke e ndjekur këtë ligë, është duke u bërë më e mirë çdo herë. Ajo po merr vëmendje dhe tifozët po kanë dëshirë t’i shohin ndeshjet e kësaj lige. Ne do ta kemi një ndeshje të vështirë ndaj Prishtinës. Gjithsesi, ne kemi pasur një stinor të mirë dhe jemi gati”, thekson Drucker. /KP/Telegrafi/

Gjysmëfinalet:

17:30, Levski-Balkan

20:15: Sigal Prishtina-Galil Gilboa.