Basha: 13 tetori e vetmja datë kushtetuese për zgjedhje

Kryetari i Partisë Demokratike të Shqipërisë, Lulzim Basha ka theksuar se data ligjore e zgjedhjeve është 13 tetori, teksa ka mohuar se ka përçarje te opozita.

Gjatë një deklarate për mediet, Basha tha se KQZ do të mbaj përgjegjësi ligjore për mos respektimin e dekretit të Presidentit.

“Nuk ka asnjë përçarje në gjirin e opozitës. Qëndrimi ynë është i qartë. 13 tetori është e vetmja datë kushtetuese e zgjedhjeve në Shqipëri. KQZ dhe të gjitha institucionet e tjera duhet të zbatonin dekretin e presidentit. Moszbatimi i ngarkon ato me përgjegjësi ligjore dhe penale”, tha Basha.

“Të gjithë do të vihen përballë përgjegjësisë ligjore dhe penale. Zgjidhja mund të vonojë, por nuk do të mungojë momenti, kur ata do të vihen përpara përgjegjësisë ligjore dhe penale. Por duhet të dallojmë të drejtën e partive politike për të mbajtur qëndrimet e tyre politike në raport me çdo proces, dhe shtetin e së drejtës, detyrimet kushtetuese dhe ligjore të KQZ dhe institucioneve të tjera. Vendimet partiake për të hyrë apo jo në zgjedhje janë vendime partiake. Vendimet për të hyrë apo jo nuk shkelin as kushtetutën e as ligjin, pavarësisht prej ndikimeve që ai mund të ketë. Kur institucionet kushtetuese shkelin kushtetutën dhe ligjin, ata duhet të mbajnë përgjegjësi”, vijoi Basha.

“Vendimi i opozitës për të mos hyrë në zgjedhjet e 30 qershorit ishte një vendim unanim. Disa parti kanë bërë kërkesë për t’u regjistruar në zgjedhje, në mënyrë që të detyronin KQZ të mos marrë qëndrime antikushtetuese e antiligjore. Presidenti po përpiqet në mënyrë aktive në zgjidhjen e krizës. Thelbi i qëndrimit të presidentit është i njëjtë me qëndrimin e Partisë Demokratike dhe aleatëve tanë, që ne kërkojmë të vijmë në pushtet me zgjedhje. Qëndrimi ynë ndaj zgjedhjeve të organizuara nga Edi Rama ka qenë i qartë, transparent, i argumentuar dhe tashmë i faktuar”, nënvizoi Basha.

Po ashtu Basha tha se “brenda javës së parë të shtatorit, opozita do të padisë në prokurorinë shqiptare dhe në atë daneze, arkitektin danez të Teatrit Kombëtar, Bjarke Ingels dhe kompaninë e tij BIG.

“Po bëhen përgatitje për të bërë të njëjtat hapa, me mundësitë që kemi në opozitë, kur të jemi në qeveri, do të kemi të tjera mundësi, edhe përsa i përket kasave fiskale”./tch/