“Ballkoni” në Festivalin e Venecies

Filmi kosovar "Ballkoni" i regjisores Lendita Zeqiraj do të shfaqet premierë botërore në festivalin më të vjetër dhe më të madh të filmit në botë, Festivalin e Venecies.

Filmi i metrazhit të shkurtër “Ballkoni” do të shfaqet në konkurim me 13 filma të tjerë nga tërë bota, të gjithë premiera botërore, në programin zyrtar “Orizzonti” që përfshinë trendet e reja në kinematografinë botërore.

Producenti i filmit, Bujar Kabashi, nga Parisi – ku gjendet për të bërë kopjet digjitale të filmit – deklaroi: “Është një lajm shumë i mirë, jo vetëm për filmin tonë, por besoj për të gjithë. Dua t’i falenderoj të gjithë ata që kontribuan për filmin”.

Edicioni i 70-të i festivalit të Venedikut do të mbahet nga 28 gushti deri me 7 shtator 2013, dhe Kosova do të jetë për here të parë në mesin e 33 shteteve nga mbarë bota me film në konkurencë zyrtare në programin garues të këtij festivali prestigjioz.

Për këtë lajm shumë të rëndësishëm për kinematografinë e Kosovës, drejtori i QKK-së, Fatos Berisha, deklaroi: “Jam tepër i lumtur dhe krenar. Pas dy vitesh aktivitetesh të shumta dhe pune të palodhëshme për promovimin e filmave tonë, kjo punë u kurorëzua me një sukses të rëndësishëm – futjen e një filmi tonë në një festival të kategorisë A, dhe atë hiq më pak se në Festivalin e Venecies: festivalin më të vjetër në botë dhe njëkohësisht ndër më të rëndësishmit. Përgëzoj regjisoren, producentin dhe ekipin e filmit. Është ky edhe një vlerësim për përzgjedhjen e filmit nga QKK, dhe kjo më bën të besoj se është bërë një hap i madh në zhvillimin e industrisë së filmit të Kosovës”.

Filmi “Ballkoni” është subvencionuar nga Qendra Kinematografike e Kosovës dhe është prodhim i shtëpisë filmike “n’Art”. Filmi “Ballkoni” ishte mbështetur edhe nga Komuna e Suharekës. Skenari dhe regjia është bërë nga Lendita Zeqiraj, producent Bujar Kabashi, xhirues Armel Hostiou, ndërsa në rolet kryesore luajnë: Arben Bajraktaraj, Sevdai Radogoshi, Osman Ahmeti. /Telegrafi/