Avokati i Justin Baldonit: Kundërpadia ndaj Blake Lively do të tronditë të gjithë

Armiqësia mes Blake Lively dhe Justin Baldonit duket se do të vazhdojë edhe në vitin 2025.

Avokati i Baldonit, Bryan Freedman, njoftoi se një kundërpadi do të depozitohet ndaj Lively në fillim të janarit, duke premtuar se përmbajtja e dosjes do të “shokojë të gjithë”.

Freedman tha se padia do të mbështetet në prova reale dhe do të zbulojë “historinë e vërtetë” për ngjarjet që ndodhën mes aktorëve dhe ekipit të tyre publicitar.

Ai e cilësoi këtë si një ndjekje të së vërtetës dhe një përpjekje për të ekspozuar manipulimin që ka ndodhur në media.

“Në mbi 30 vjet praktike, nuk kam parë një nivel kaq të lartë manipulimi të medias për të krijuar një narrativë të rreme,” shtoi Freedman.

Ngjarjet që çuan në këtë kundërpadi filluan me një ankesë ligjore të depozituar nga Lively më 20 dhjetor, ku ajo akuzoi Baldonin për ngacmim seksual dhe sjellje të papërshtatshme gjatë xhirimeve të filmit ‘It Ends with Us’.

Lively pretendoi se Baldoni kishte kritikuar trupin dhe peshën e saj, ndërkohë që e kishte ngacmuar duke diskutuar për detaje të jetës së saj intime dhe varësinë e tij nga filmat për të rritur.

Përgjigjja e Baldonit ka qenë e prerë: ai ka mohuar të gjitha akuzat e ngritura ndaj tij. Gjithashtu, Baldoni ka përjetuar pasoja profesionale, përfshirë një padi nga një ish-publicist dhe largimin nga agjencia WME, e cila gjithashtu përfaqëson Lively dhe burrin e saj, Ryan Reynolds.

Në një zhvillim tjetër, organizata ‘Vital Voices’ tërhoqi një çmim që i ishte dhënë Baldonit, duke e cilësuar sjelljen e tij si “shqetësuese” dhe “në kundërshtim me vlerat” që mbështet.

Ndërkohë, disa detaje të kundërpadisë së Baldonit pritet të përfshijnë pretendime se përfaqësuesit e Lively manipulonin mesazhe dhe përdornin mediet për të dëmtuar reputacionin e Baldonit, duke tentuar të mbulojnë një krizë publiciteti.

‘It Ends with Us’, filmi ku luajnë edhe aktorët Jenny Slate dhe Hasan Minhaj, ishte një hit i madh, me të ardhura globale prej 350 milionë dollarësh. /Telegrafi/