Athina: Zgjedhjet lokale nuk arsyetojnë shtyrjen e regjistrimit të popullsisë

Greqia ka bërë të ditur se është skeptike në lidhje me vendimin për shtyrjen e regjistrimit të popullsisë mbi baza etnike dhe fetare dhe me arsyet që ka dhënë qeveria shqiptare për këtë vendim. E përditshmja Panorama raportoi të premten se Ministria e Jashtme greke ka reaguar nëpërmjet zëdhënësit të saj Gregory Delavekouras, i cili në deklaratën e bërë ka thënë se regjistrimi është kusht për në Bashkimin Evropian.

“Nga ana jonë nënvizojmë vendimin e qeverisë shqiptare, si dhe arsyet që deklarohet për shtyrjen e saj. Megjithatë duhet të theksoj se data e zhvillimit të zgjedhjeve lokale ishte e njohur prej shumë kohësh dhe nuk përbën një zhvillim të tanishëm që do të arsyetonte ndryshimin e planeve…Ju kujtoj se regjistrimi që do të zhvillohet brenda vitit 2010 me pyetësor që do të përmbajë pyetje jo të detyrueshme për prejardhjen etnike, bindjet fetare, gjuhën amtare, cilësohet nga Bashkimi Evropian si kusht për t’u plotësuar nga Shqipëria për detyrimin e vet të mbledhjes së të dhënave të sakta për minoritetet, për të zhvilluar
edhe politikat përkatëse”, ka thënë Delavekouras.

Ndërkaq, zëdhënësi i Ministrisë së Jashtme greke pohoi edhe kthimin në detyrë të konsullit Thedoros Ikonomu, i cili me sa duket u thirr në Athinë si pjesë e një lëvizjeje taktike për të tërhequr vëmendjen nga jehona e krijuar pas deklaratave të tij kontroverse. “Zhurma e bërë është kryesisht gazetareske. Konsulli ynë është në ditët e fundit në Athinë për arsye shërbimi dhe do të kthehet normalisht në detyrën e tij, nuk ka çështje tjetër”, tha Delaverkouras. /Telegrafi/