Arrestohet në Morinë 25 vjeçari nga Fushë Kosova – i njëjti ishte shpall në kërkim nga Gjermania

Policia e Shtetit në Shqipëri ka njoftuar se është arrestuar një person i cili ishte i shpallur në kërkim ndërkombëtarë për veprën penale “Mashtrim i rëndë” dhe i njëjti do të ekstradohet drejt Gjermanisë.

“Në hyrje të Pikës së Kalimit Kufitar Morinë, shërbimet e Policisë Kufitare, si rezultat i kontrolleve me përzgjedhje dhe shkëmbimit të informacionit me Interpol Tirana, kanë ndaluar shtetasin e shpallur në kërkim ndërkombëtar: J. D., 25 vjeç, banues në Fushë Kosovë”, thuhet në njoftim.

Gjatë përpunimit dhe verifikimit të të dhënave në sistem, ky shtetas ka rezultuar person në kërkim ndërkombëtar nga autoritetet gjermane, pasi Gjykata e Bambergut, Gjermani, me vendimin e datës 14.06.2022, i ka caktuar masën e sigurisë “Arrest në burg”, për veprën penale “Mashtrimi i rëndë”, parashikuar nga legjislacioni penal i Gjermanisë.

“Në përfundim të veprimeve, specialistët e Seksionit për Hetimin e Krimeve Ekonomike dhe Financiare të DVP Kukës bënë arrestimin provizor të këtij shtetasi, me qëllim ekstradimin e tij drejt Gjermanisë. Interpol Tirana, në bashkëpunim me autoritetet gjermane, vijon procedurat për ekstradimin e këtij shtetasi”, thuhet në njoftim. /Telegrafi/