Arrestohen dy persona në Gjakovë, të dyshuar për vjedhje

Drejtoria Rajonale e Policisë në Gjakovë përmes një njoftimi për media thekson se ka konfiskuar sasi të konsiderueshme të armëve ilegale, dhe ka arrestuar dy persona.

“Me datën 22.02.2019 stacioni policor në Gjakovë ka marrë informacion për një rast vjedhje grabitqare, ku personi i dyshuar kishte hyrë në një furrë buke i maskuar dhe duke përdorur një mjet të mprehtë nën presionin e kanosjes kishte vjedhur kasafortën me të holla si dhe një telefon mobil e po ashtu gjatë përleshjes me viktimën ky i fundit kishte pësuar lëndime trupore.

Në njoftimin për media thuhet se pas një pune operativo-hetimore me datën 28.02.2019 është arritur të identifikohet dhe të arrestohet personi i dyshuar: S. S. mashkull 37 vjeç, shtetas i Republikës së Kosovës. Policia ka siguruar prova të mjaftueshme të cilat i janë dorëzuar në prokurori dhe ndaj personit të dyshuar është ushtruar kallëzim penal policor. Me vendim të prokurorit të shtetit personit të dyshuar i është caktuar masa e ndalimit prej 48 orësh”, thuhet në njoftim.

Po ashtu kjo drejtori ka njoftuar se me datën 28.02.2019 Sektori i Hetimeve nga stacioni policor në Gjakovë ka realizuar një operacion bastisjeje në fshatin Smolicë të Gjakovës, konform urdhëresës së lëshuar nga Gjykata Themelore ku si rezultat i një pune operative dhe hetimore që hetuesit policorë kanë bërë, janë gjetur dhe janë konfiskuar: dy armë automatike AK-47, një armë gjysmë automatike dhe municion në sasi të konsiderueshme. Në njoftim thuhet se personi i dyshuar është arrestuar nga Policia dhe pas procedimit në konsultim me prokurorin i njëjti është liruar në procedurë të rregullt. /Telegrafi/