Argjentina publikon listën për ndeshjet e tetorit, Messi dhe Higuain udhëheqin sulmin

Lionel Messi dhe Gonzalo Higuain do të jenë pjesë e skuadrës së Argjentinës për ndeshjet e radhës së eliminatoreve të Botërorit 2018, ndaj Perusë dhe Paraguait që do të luhen në 6 dhe 11 tetor.

Trajneri Edgardo Bauza e publikoi listën e të përzgjedhurve për këto dy ndeshje, ku të bie në sy edhe rikthimi i Agueros, i cili mungoi në sfidat e mëparshme për arsye dëmtimi.

Ndërkaq, Javier Pastore, i cili mungoi në sfidat e luajtura gjatë këtij muaji, nuk do të jetë as në ato të muajit të ardhshëm.

Trajneri Bauza deklaroi se skuadra e tij do të jetë gati për këto sfida ndaj Perusë dhe Paraguait.

“Peruja do të luajë si një skuadër vendase, me 4-5 lojtarë që do të bëjnë presing në 3/4 e fushës, ndërsa Paraguai është një skuadër që përdor taktikën e kundërsulmit, gjë që është shumë e rrezikshme. Kështu që, përveçse duhet të tregohemi të kujdesshëm, detyra jonë kryesore është që të zhvillojmë një lojë sa më të mirë”, tha Bauza.

Argjentina është në vendin e tretë të renditjes së Grupit Amerikano-latin të “Rusi 2018”.

Në fazën finale të këtij aktiviteti kualifikohen direkt 4 skuadrat e para, ndërsa ajo e vendit të pestë do të luajë ndeshjen e “playoff”-it ndaj një ekipi nga Oqeania.

Portier: Sergio Romero (Manchester United), Nahuel Guzman (Tigres).

Mbrojtës: Facundo Roncaglia (Celta de Vigo), Mateo Musacchio (Villarreal), Ramiro Funes Mori (Everton), Marcos Rojo (Manchester United), Martin Demichelis (Espanyol), Pablo Zabaleta (Manchester City), Gabriel Mercado (Sevilla), Nicolas Otamendi (Manchester City).

Mesfushorë: Matias Kranevitter (Sevilla), Javier Mascherano (Barcelona), Lucas Biglia (Lazio), Augusto Fernandez (Atletico Madrid), Ever Banega (Inter Milan), Erik Lamela (Tottenham), Nicolas Gaitan (Atletico Madrid), Ángel Di Maria (PSG).

Sulmues: Lionel Messi (Barcelona), Angel Correa (Atletico Madrid), Lucas Pratto (Atletico Mineiro), Sergio Aguero (Manchester City), Paulo Dybala (Juventus), Gonzalo Higuain (Juventus).