Apnea rrezikon shëndetin e eshtrave

Hulumtimi i ri i shkencëtarëve nga Tajvani tregon se apnea rrit rrezikun nga osteoporoza, sidomos në mesin e grave dhe të moshuarve.

Apnea shkakton një ndërprerje të shkurtër të frymëmarrjes në mënyrë të përsëritur gjatë natës, ndërsa studimet e mëparshme kanë treguar se rrit rrezikun nga sulmi në tru dhe në zemër, sëmundjet kardiovaskulare, diabeti i tipit 2 dhe trashësia.

Shkencëtarët kanë studiuar shëndetin e 1.377 pjesëmarrësve, derisa disave iu diagnostikua apnea. Në një periudhë prej gjashtë vjetësh, ata kanë përcjellë se si ndryshon shëndeti i eshtrave të tyre.

Ata zbuluan se osteoporoza është madje 2.7 herë më e shpeshtë në mesin e personave që vuajnë nga apnea, në krahasim me ata që nuk vuajnë nga apnea.

“Apnea e patrajtuar mund ta dëmtojë shëndetin e shumicës së sistemeve të trupit, duke përfshirë sistemin skeletor”, tha një nga drejtuesit e hulumtimit, dr. Kai-Jen Tien.

Apnea shkakton mungesën e oksigjenit në trup. Kjo mund t’i dobësojë eshtrat dhe ta rrisë rrezikun nga osteoporoza. Gjendja e patrajtuar mund të shkaktojë fraktura të eshtrave dhe ta reduktojë ndjeshëm cilësinë e jetës.

Shkencëtarët, gjetjet e të cilëve janë publikuar në “Journal of Clinical Endocrinology & Metabolism”, theksojnë se duhet t’i kushtojmë më shumë vëmendje ndikimit të apnesë në shëndetin e përgjithshëm.

Apnea është e vështirë për t’u diagnostikuar, sepse ajo ndodh kur personi fle. Nëse dyshoni se vuani nga apnea, gjithsesi konsultohuni me mjekun.

Disa nga simptomat e apnesë, të cilat manifestohen në gjendje të zgjuar, janë lodhja kronike, pa marrë parasysh sasinë e gjumit, si dhe vështirësitë me përqendrimin. /Telegrafi/