Ambasadorja e Suedisë: Stokholmi mund të arrijë “imunitetin e tufës” ndaj coronavirusit deri në maj

Ambasadorja e Suedisë në Shtetet e Bashkuara ka thënë se kryeqyteti i vendit nordik mund të arrijë imunitetin e tufës deri në maj – një rezultat i një përgjigje të diskutueshme ndaj pandemisë coronavirus që përfshin vetëm disa kufizime publike.

“Rreth 30 për qind e njerëzve në Stokholm kanë arritur një nivel imuniteti”, ka thënë Karin Ulrika Olofsdotter për Radio Publike Kombëtare (NPR), përcjell Telegrafi.

Ndryshe, deri më tani, afër tre milionë njerëz janë infektuar nga coronavirusi i ri, i cili ka shkaktuar më shumë se 206,000 vdekje në të gjithë botën.

“Ne mund të arrijmë imunitetin e tufës në kryeqytet qysh në muajin tjetër”, tha Olofsdotter në intervistën e botuar të shtunën.

I ashtuquajturi “Imuniteti i tufës” ndodh kur një përqindje e mjaftueshme e një popullate bëhet imune ndaj një virusi, qoftë përmes infeksionit ose vaksinimit, duke parandaluar kështu përhapjen e mëtejshme në të gjithë grupin.

Ndërsa përqindjet ndryshojnë bazuar në patogjenin, këshilltari kryesor shkencor i Mbretërisë së Bashkuar ka thënë se modelet tregojnë rreth 60 për qind të një komuniteti të caktuar do të duhet të jenë imunë për të arritur imunitetin e tufës për coronavirusin e ri, SARS-CoV-2.

Sidoqoftë, mbetet ende e paqartë se sa imun është një pacient i rikuperuar nga coronavirusi dhe sa zgjat ky imunitet.

Organizata Botërore e Shëndetit (OBSH) ka paralajmëruar kundër qeverive që lëshojnë të ashtuquajturat “pasaporta të imunitetit” për ata që janë shëruar nga sëmundja e shkaktuar nga coronavirusi, COVID-19.

Kjo pasi që Koreja e Jugut ka raportuar kohët e fundit se 222 pacientë të COVID-19 përsëri kanë testuar pozitivë pasi u tha se ishin “të pastër nga virusi”.

Autoritetet atje janë duke punuar për të përcaktuar nëse testet nuk arritën të njohin virusin që ishte ende i pranishëm në ata pacientë, ose nëse individët ishin me të vërtetë të “ri infektuar”.

Në intervistën me NPR, Olofsdotter u pajtua se nevojiten më shumë hulumtime dhe testime për t’iu përgjigjur pyetjeve që lidhen me imunitetin, duke shtuar se qeveria suedeze është e gatshme të ndryshojë strategjinë e saj nëse situata e kërkon atë. /Telegrafi/