AGK dënon arrestimin e fotoreporterit Blerim Uka

(E plotësuar)- AGK ka bërë të ditur se fotoreporteti Blerim Uka, është ende duke u intervistuar dhe se Policia Maqedonase ka kërkuar kontrollimin e materialeve të tij.

“Uka pritet të lirohet së shpejti. AGK do të ju mbaj të informuar në vazhdimësi”, ka njoftuar AGK.

——————————–

Asociacioni i Gazetarëve të Kosovës e dënon arrestimin e kolegut dhe anëtarit të AGK-së, Blerim Uka në Shkup të Maqedonisë. AGK është njoftuar se kolegu Uka është arrestuar gjatë ditës së sotme derisa ai ishte duke raportuar për seancën gjyqësore në rastin e njohur si “Kumanova”.

“Siç mëson AGK, kolegu Uka ka qenë paraprakisht i akredituar për të përcjellur këtë seancë gjyqësore dhe se arrestimi i tij ka ndodhur jashtë ambienteve të gjykatës.

AGK kërkon nga autoritetet maqedonase që të lirojnë menjëherë kolegun Blerim Uka duke treguar kështu se nuk janë pengues të punës së gazetarëve dhe shkelës të lirisë së mediave”, thuhet në njoftimin e AGK-së.

AGK është duke u përpjekur vazhdimisht që të kontaktojë me Ambasadën e Kosovës në Maqedoni si dhe me autoritetet maqedonase. Poashtu, AGK ka kërkuar ndihmë nga Asociacioni i Gazetarëve të Maqedonisë.

Duke shpresuar në sqarim sa më të shpejt të kësaj situate, AGK beson në lirim të shpejt të kolegut në fjalë. /Telegrafi/