Agjencitë e inteligjencës në SHBA, të ndara rreth origjinës së COVID-19

Komuniteti i inteligjencës amerikane nuk ka qenë në gjendje të përcaktojë origjinën e Covid-19 dhe është i ndarë nëse ka rrjedhur nga një laborator apo është zhvilluar në natyrë, sipas një raporti të ri.

Sipas bbc, përcjell Telegrafi, raporti i lëshuar nga zyra që mbikëqyr 18 agjencitë spiune të kombit përcaktoi përfundimisht se nuk ishte zhvilluar si armë biologjike.

Sidoqoftë, ekspertët paralajmërojnë se koha po mbaron për të mbledhur dëshmi për fillimet e tij.

Ndërkohë që ministri i Jashtëm i Kinës e ka hedhur poshtë raportin si “anti-shkencë”.

Raporti nga Zyra e Drejtorit të Inteligjencës Kombëtare tha se komuniteti i inteligjencës mbetet i ndarë në origjinën më të mundshme të Covid.

“Të gjitha agjencitë vlerësojnë se dy hipoteza janë të besueshme: ekspozimi natyror ndaj një kafshe të infektuar dhe një incident i lidhur me laboratorin”.

Sipas raportit, disa agjenci spiune të paidentifikuara menduan se Covid-19 doli nga “ekspozimi natyror ndaj një kafshe të infektuar me të ose një virusi të afërt paraardhës”.

Por ata kishin vetëm “besim të ulët” në këtë përfundim.

Ndërsa një agjenci inteligjence krijoi “besim të moderuar” se infeksioni i parë njerëzor ka të ngjarë të jetë një “incident i lidhur me laboratorin” në Institutin e Virologjisë Wuhan, i cili ka studiuar coronaviruset tek lakuriqët e natës për më shumë se një dekadë.

Dhe presidenti Joe Biden lëshoi një deklaratë pas publikimit të raportit, duke kritikuar Kinën për mos bashkëpunimin me hetimin.

“Informacioni kritik në lidhje me origjinën e kësaj pandemie ekziston në Republikën Popullore të Kinës, por që nga fillimi, zyrtarët qeveritarë në Kinë kanë punuar për të parandaluar që hetuesit ndërkombëtarë dhe anëtarët e komunitetit global të shëndetit publik të kenë qasje në të”, ka thënë Biden.

“Bota meriton përgjigje dhe unë nuk do të pushoj derisa t’i marrim ato”, shtoi ai.

Pandemia, e cila ka marrë gati 4.5 milionë jetë në të gjithë botën, filloi në qytetin kinez Wuhan në dhjetor të vitit 2019.

Një ekip i Organizatës Botërore të Shëndetit (OBSH), i cili vizitoi Wuhanin, konkludoi në fillim të këtij viti se sëmundja ka shumë të ngjarë të përhapet nga një kafshë e shitur në një treg.

Por ky përfundim është hedhur poshtë nga disa shkencëtarë. /Telegrafi/