Në zgjedhje me të njëjtin kod zgjedhor

Kodi Zgjedhor mbetet në fuqi nëse partitë politike nuk do të arrijnë të miratojnë ndryshime të reja përmirësuese. Kreu i Komisionit Qendror të Zgjedhjeve (KQZ), Arben Ristani ka thënë se bllokimi politik i tanishëm nuk ndikon në mbarëvajtjen ligjore të procesit të ardhshëm zgjedhor.

“Do të ishte mirë që të kryheshin ndryshimet e rekomanduara nga OSBE/ODIHR-i. Megjithatë Kodi aktual, i miratuar me konsensus të gjerë politik, i jepet zgjidhje situatave që mund të dalin gjatë procesit zgjedhor”, ka thënë Ristani, i cituar të dielën nga e përditshmja Shqip.

Ristani ka thënë se bojkoti i mbledhjeve, përveçse krijon probleme, i ka vënë anëtarët në kushte të përballjes me ligjin për çështjen e mandatit të tyre. Për momentin, edhe ky problem duket i tejkalueshëm apo i menaxhueshëm nga shumica, teksa një sërë vendimesh deri më tani kanë kaluar, pavarësisht mungesës së tre anëtarëve të majtë.

KQZ-ja do të vazhdojë përgatitjet për zgjedhjet. Sipas Ristanit, shumë shpejt do të nisë puna për “trajnimin e komisionerëve të niveleve të dyta e të treta”. /Telegrafi/