Oda Ekonomike Amerikane: Pushteti po përpiqet të heshtë kërkesat për transparencë dhe llogaridhënie

Oda Ekonomike Amerikane në Kosovë ka shprehur shqetësimin e thellë lidhur me deklaratën e Qeverisë së Republikës së Kosovës, e cila tha se odat ekonomike nuk duhet të komentojnë çështjet që kanë të bëjnë me promovimin e sundimit të ligjit dhe llogaridhënies në qeverisje.

Oda Ekonomike Amerikane ka quajtur këtë qëndrim si të motivuar politikisht dhe ka theksuar se ky është një hapi i papranueshëm në drejtim të frenimit të lirisë së shprehjes dhe të angazhimit të qytetarëve në çështjet e rëndësishme për shoqërinë.

Në një njoftim për media, Oda Ekonomike Amerikane ka theksuar se, si një organizatë që për më shumë se dy dekada ka avokuar për një mjedis më të favorshëm afarist, ajo beson se “keqpërdorimet e pretenduara në prokurimin publik minojnë konkurrencën e drejtë ndërmjet operatorëve ekonomikë dhe çojnë në keqpërdorimin e mundshëm të fondeve publike, duke cenuar kështu besimin e tatimpaguesve”

Lexo po ashtu Kurti shpërfilli urdhrin e Gjykatës për intervistim, Zyra e Kryeministrit del me një sqarim

Oda gjithashtu ka shprehur shqetësim për përpjekjet e pushtetit ekzekutiv për të “diktuar diskursin e akterëve joshtetërorë”, duke përfshirë organizatat dhe mediat, përmes “përpjekjeve për delegjitimim të qëndrimeve të tyre”. Sipas tyre, një politikë e tillë mund të dëmtojë ndjeshëm klimën e lirisë dhe të shprehjes në vend.

“Kosova ka ndërmarrë përpjekje të jashtëzakonshme për të ndërtuar themele të forta të demokracisë, dhe asnjë përpjekje nuk mund të cenojë suksesin e arritur,” thuhet në njoftim.

Për më tepër, Oda Ekonomike ka nënvizuar se çdo organizatë e shoqërisë civile, media apo individ tjetër ka “për obligim dhe duhet të avokojë fuqishëm në kërkim të llogaridhënies dhe transparencës.”

Sipas tyre, “është e domosdoshme që institucionet e drejtësisë të lejohen të kryejnë punën e tyre pa ndërhyrje.”

Në përfundim, Oda Ekonomike Amerikane në Kosovë ka theksuar rëndësinë që çdo individ, pavarësisht pozitës zyrtare, të dëshmojë në praktikë se “Kosova është një shtet i së drejtës.”. /Telegrafi/