“Ne kemi një plan B, C, D”, thotë presidentja e Meksikës – nëse Trump aplikon tarifat për vendin e saj

Presidentja meksikane Claudia Sheinbaum tha të hënën se administrata e saj po monitoron nga afër nëse presidenti i SHBA-së, Donald Trump ndjek kërcënimin e tij për të vendosur tarifa 25 për qind ndaj importeve meksikane.

“Ne kemi një plan B, C, D”, tha Sheinbaum gjatë një konference për shtyp të hënën, pa dhënë detaje të planeve, përcjell Telegrafi.

Trump do të vendosë një tarifë prej 25 për qind mbi importet nga Kanadaja dhe Meksika të martën dhe do të dyfishojë tarifat e tij për produktet kineze në 20 për qind.

Tarifat, të shpallura nga Shtëpia e Bardhë, janë pjesë e strategjisë më të gjerë të Trump për të frenuar fluksin e fentanilit dhe imigracionit të paligjshëm në Shtetet e Bashkuara.

Trump fillimisht kërcënoi tarifat në shkurt, por i pezulloi ato në minutën e fundit pasi Meksika vendosi 10,000 trupa të Gardës Kombëtare për të frenuar trafikun e drogës dhe imigrimin e paligjshëm në kufi.

Trump i vonoi masat për një muaj, por zhvillimet e fundit sugjerojnë se përpjekjet e Meksikës nuk ishin të mjaftueshme për ta kënaqur atë.

Zyrtarët meksikanë po shqyrtojnë strategji alternative ekonomike, me Sheinbaum që deklaroi të hënën se vendi ka “Plan B, C dhe D” gati nëse diplomacia dështon. /Telegrafi/