Gjykata bllokon përpjekjen e Trump për të shkarkuar kreun e një agjencie federale

Një gjykatës federal vendosi të shtunën se shkarkimi nga presidenti Donald Trump i një mbikëqyrësi federal ishte i paligjshëm – duke shkaktuar një përballje të Gjykatës së Lartë mbi pretendimin e presidentit për kontroll pothuajse absolut të degës ekzekutive.

Gjykatësja e qarkut amerikan, Amy Berman Jackson arriti në përfundimin se Hampton Dellinger – i konfirmuar vitin e kaluar si kreu i Zyrës së Prokurorit Special – mund të vazhdojë të shërbejë mandatin e tij pesëvjeçar, pavarësisht përpjekjeve të Trump për ta hequr atë nga posti përmes një emaili të ashpër muajin e kaluar, transmeton Telegrafi.

Një ligj për më shumë se katër dekada, specifikon se avokati i posaçëm mund të hiqet vetëm për “mosefikasitet, neglizhencë të detyrës ose keqbërje në detyrë”, por Departamenti i Drejtësisë argumentoi se dispozita është jokushtetuese sepse cenon autoritetin e presidentit për të kontrolluar agjencitë ekzekutive.

Jackson vendosi që detyrat e Dellinger-it, të cilat përfshijnë mbajtjen e zyrtarëve të degës ekzekutive përgjegjës për shkeljet e etikës dhe paraqitjen e ankesave të sinjalizuesve, kishin për qëllim të ishin të pavarura nga presidenti, duke e bërë pozicionin një përjashtim të rrallë nga sfera e gjerë e presidentit mbi degën ekzekutive.

“Pavarësia e Dellinger është e ndërthurur pazgjidhshmërisht me kryerjen e detyrave të tij”, shkroi Jackson në një opinion prej 67 faqesh.

Avokatët e Departamentit të Drejtësisë pretenduan se Dellinger kishte fuqi të konsiderueshme për të vepruar në mënyrë të njëanshme, duke e bërë kritike që ai të ishte nën kontrollin e presidentit, por Jackson tha se avokatët e Trump po ekzagjeronin fushëveprimin e këshilltarit special.

“Ky nuk është autoritet ekzekutiv i rëndësishëm. Nuk është aspak autoritet ekzekutiv,” tha gjykatësja e emëruar nga presidenti Joe Biden.

Më pak se një orë pasi Jackson vendosi, Departamenti i Drejtësisë apeloi vendimin e saj në Gjykatën e Apelit të Qarkut D.C. /Telegrafi/