Protestë masive kundër Vuçiqit në Nish

Protesta “Edikti Studentor”, protesta e pestë masive e nxitur nga vdekja e 15 personave nga shembja e strehës në stacionin hekurudhor të Novi Sadit më 1 nëntor të vitit të kaluar, filloi sot në Nish dhe do të zgjasë deri në orën tre pas mesnate.

Studentët, në grupe të ndryshme, u nisën në mëngjes nga fakultetet e Nishit drejt qendrës së qytetit, ku do t’u bashkohen qytetarët e Nishit dhe mijëra persona nga vendet përreth dhe e gjithë Serbia. Trafiku në qendër të qytetit është bllokuar, ndërsa përgatitjet për pritjen e mijëra protestuesve kanë nisur që nga mëngjesi, shkruan nova.rs.

Në Nish, studentët arritën mbrëmë nga shumë qytete të Serbisë, pas ditësh marshimi, duke ecur, vrapuar në një ultra-maratonë apo me biçikleta. Pasi përshkuan deri në 200 kilometra në këmbë, ata u pritën me ovacione, fishekzjarrë, qilim të kuq dhe një shpërthim emocionesh. Po kështu, gjatë rrugës u mirëpritën dhe u përcollën me mbështetje në qytetet dhe vendbanimet nga të cilat kaluan, ku banorët u siguruan ushqim dhe freski, ndërsa shumë prej tyre iu bashkuan rrugëtimit drejt Nishit.

Još nije ni počelo. Niš !!! pic.twitter.com/tBBQwvoBc0

— Mirko Topalovic official (@mirkotopalovic7) March 1, 2025

Emri i protestës, “Edikti Studentor”, ka një lidhje simbolike me Ediktin e Milanos të perandorit Konstandin i Madh në vitin 313, i cili lindi në Naissusin e atëhershëm, sot Nish, dhe përmes ediktit të tij vendosi barazinë fetare në Perandorinë Romake.

Protesta do të zgjasë 18 orë në mënyrë simbolike, pasi 018 është kodi telefonik i Nishit, por njëkohësisht është edhe një “thirrje për ndryshimin e nevojshëm”, kanë njoftuar studentët e Universitetit të Nishit, organizatorët e tubimit në qytetin e katërt universitar të Serbisë.

Lexo po ashtu Studentët serbë nga Kosova, do të protestojnë kundër Vuçiqit në Nish

Protestat studentore, që nga 22 nëntori i vitit të kaluar, janë shndërruar në një lëvizje të fuqishme dhe kanë çuar në bllokimin e më shumë se 60 fakulteteve, pasi një grup mbështetësish dhe zyrtarësh të Partisë Përparimtare Serbe sulmuan studentët e Fakultetit të Arteve Dramatike në Beograd, të cilët po nderonin me 15 minuta heshtje viktimat e tragjedisë në stacionin hekurudhor të Novi Sadit.

Lëvizja studentore ka marrë mbështetje masive në mbarë vendin, ndërsa protesta solidariteti dhe momentet përkujtimore me bllokim trafiku mbahen çdo ditë nga ora 11:52 deri në 12:07, simbolikisht në të njëjtën kohë kur ndodhi shembja fatale e strehës.

Ndryshe, protestës do t’i bashkohen gjatë ditës edhe disa studentë serbë nga Kosova. /Telegafi/

15 minuta tišine na Trgu kralja Milana u Nišu 💔#niš #studentskiedikt pic.twitter.com/jh385nOYAj

— Mateja (@MATEJANIKOLlC) March 1, 2025