Ftohja dhe infeksioni i sinusit mund të dallohen nga ngjyra e sekrecioneve të hundës

Infeksioni i sinusit mund të shkaktohet nga infeksione bakteriale ose virusale. Ftohja e zakonshme zgjat 7 deri në 10 ditë, ndërsa infeksioni i sinusit mund të zgjasë 3 deri në 8 javë

Simptomat si hunda e bllokuar, dhimbja e kokës dhe fytit mund të duken si një ftohje e zakonshme, por ato mund të jenë gjithashtu një shenjë e sinusitit akut bakterial, një lloj infeksioni i sinusit. Megjithatë, këto dy gjendje – ftohja e zakonshme dhe infeksionet e sinusit – kanë simptoma shumë të ngjashme, kështu që ato shpesh ngatërrohen.

Fatkeqësisht, nuk ka një përgjigje të thjeshtë për të dalluar një ftohje dhe një infeksion të sinusit. Vetëm rreth 2 deri në 6 për qind e ftohjeve të zakonshme kthehen në një infeksion të vërtetë bakterial të sinusit që mund të përfitojë nga antibiotikët.

Përcaktimi i një infeksioni të sinusit dhe i ftohjes së zakonshme

Çdo vit, rreth 31 milionë njerëz përjetojnë infeksione të sinusit (sinusit), të cilat zakonisht shkaktohen nga bakteret ose viruset që rriten në sinuset, zgavrat pas hundës, sytë, vetullat dhe mollëzat.

Më shpesh, infeksionet e sinuseve shkaktohen nga viruset, por shkaktarë mund të jenë edhe infeksionet bakteriale. Një infeksion bakterial ose virusal shkakton ënjtje të mukozës në sinuse dhe bllokon hapjet e vogla në sinus, duke penguar kapacitetin e tyre për drenazhim. Mukoza e bllokuar lejon që bakteret të shumohen, duke shkaktuar dhimbje dhe presion në kokë dhe fytyrë.

Ftohjet janë infeksione të lehta virale të traktit të sipërm respirator dhe nuk shkaktohen nga grumbullimi i baktereve dhe inflamacioni në sinus. Megjithatë, një ftohje mund të çojë në një infeksion të sinusit.

Antibiotikët mund të jenë të dobishëm për trajtimin e infeksioneve bakteriale të sinusit, por janë të padobishëm kundër viruseve të ftohjes ose infeksioneve virale të sinuseve, transmeton Telegrafi.

Diferencimi sipas simptomave

Edhe pse disa simptoma të një ftohjeje dhe infeksioni të sinusit mund të jenë të ngjashme (hunda e mbytur, dhimbje fyti dhe kollë), ka gjithashtu dallime.

Ngjyra e sekrecioneve nga hunda mund të ndihmojë në dallimin midis ftohjes dhe sinusitit. Ftohja zakonisht shkakton rrjedhje të qartë, ndërsa infeksionet bakteriale çojnë në shfaqjen e mukusit të gjelbër ose të verdhë. Megjithatë, viruset ndonjëherë mund të çngjyrosin edhe sekrecionet, kështu që ky nuk është një test plotësisht i besueshëm.

Simptomat e ftohjes

Dallimi kryesor midis simptomave të ftohjes dhe infeksionit të sinusit është se sa zgjasin ato. Njerëzit me ftohje zakonisht kanë hundë për 2 deri në 3 ditë, e ndjekur nga një hundë e zënë për 2 deri në 3 ditë të tjera. Shumica e njerëzve shërohen nga simptomat brenda 7-10 ditëve.

Simptomat e mëposhtme janë të zakonshme me ftohjen:

▪ Teshtitja
▪ Hunda e bllokuar
▪ Rrjedhje nga hunda
▪ Dhimbje fyti
▪ Kollë

Simptomat e infeksionit të sinusit

Një infeksion i sinusit zakonisht zgjat më shumë se një ftohje e zakonshme, nga 3 deri në 8 javë. Ethet gjithashtu mund të tregojnë një infeksion bakterial. Ndonjëherë ato shoqërohen me temperaturë të ulët, ndërsa ftohja zakonisht nuk e shkakton këtë. Megjithatë, infeksione të tjera virale (si gripi) mund të shkaktojnë ethe.

Këtu janë disa simptoma të tjera të infeksionit të sinusit:

▪ Rrjedhje nga hunda
▪ Hunda e bllokuar
▪ Dhimbje/presion në fytyrë
▪ Dhimbje koke
▪ Mukoza që rrjedh nëpër fyt
▪ Dhimbje fyti
▪ Kollë
▪ Era e keqe e gojës

Trajtimi i ftohjes dhe sinusitit

Për shumicën e njerëzve, ekzistojnë masa parandaluese që mund të ndihmojnë në parandalimin e një infeksioni të sinusit ose, nëse ndodh, lehtësojnë simptomat. Rekomandohet pushimi, pirja e shumë lëngjeve, thithja e avullit dhe ujitja e sinuseve me sprej fiziologjik.

Mund të ndihmojnë edhe medikamentet pa recetë, si dekongestantët, por ato nuk duhet të përdoren më shumë se tre ditë, pasi disa produkte mund të përkeqësojnë kongjestionin dhe të rrisin presionin e gjakut dhe rrahjet e zemrës.

Infeksionet bakteriale të sinuseve mund të zgjasin deri në 8 javë, por përdorimi i antibiotikëve përshpejton procesin e rikuperimit. Megjithatë, rreth 70 për qind e infeksioneve të sinusit zgjidhen vetë dhe shumë pacientë preferojnë t’i lënë ato të zhvillohen natyrshëm.

Megjithatë, nëse nuk trajtohet, sinusiti mund të shkaktojë dëmtime të përhershme në sinuset dhe, në raste shumë të rralla, mund të çojë në meningjit. Nëse pacientët humbasin punën ose aktivitetet e tjera për shkak të infeksioneve të sinusit, ose nëse simptomat përsëriten shpesh, ata duhet të vizitohen te mjeku për vlerësim. /Telegrafi/