Apple tërheq mjetin për mbrojtjen e të dhënave të përdoruesve nga Mbretëria e Bashkuar

Apple po ndërmerr hapin e paprecedentë për heqjen e mjetit të saj të sigurisë së të dhënave të nivelit më të lartë nga klientët në Mbretërinë e Bashkuar, pasi qeveria kërkoi qasje në të dhënat e përdoruesve.

Mbrojtja e avancuar e të dhënave (ADP) do të thotë që vetëm mbajtësit e llogarisë mund të shikojnë artikuj të tillë si fotografitë ose dokumentet që ata kanë ruajtur në internet përmes një procesi të njohur si enkriptimi end-to-end.

Por në fillim të këtij muaji, qeveria e Mbretërisë së Bashkuar kërkoi të drejtën për të parë të dhënat, të cilat aktualisht as Apple nuk mund t’i aksesojë.

Apple nuk komentoi në atë kohë, por vazhdimisht ka kundërshtuar krijimin e një “backdoor” në shërbimin e saj të enkriptimit, duke argumentuar se nëse do ta bënte këtë, do të ishte vetëm çështje kohe para se edhe “aktorët e këqij” të gjenin një mënyrë për të hyrë.

Tani gjiganti i teknologjisë ka vendosur se ADP nuk do të jetë më e mundur të aktivizohet në Mbretërinë e Bashkuar, shkruan BBC, përcjell Telegrafi.

Kjo do të thotë se përfundimisht jo të gjitha të dhënat e klientëve në Mbretërinë e Bashkuar të ruajtura në iCloud – shërbimi i ruajtjes së cloud të Apple – do të jenë plotësisht të koduara.

Bëhet e ditur se të dhënat me kriptim standard janë të aksesueshme nga Apple dhe do të ndahen me forcat e zbatimit të ligjit, nëse ata kanë një urdhër.

Në një deklaratë, Apple tha se ishte “shumë e zhgënjyer” që funksioni i sigurisë nuk do të ishte më i disponueshëm për klientët britanikë.

Si funksionon kriptimi?

Shërbimi ADP është opt-in, që do të thotë se njerëzit duhet të regjistrohen për të marrë mbrojtjen që ofron.

Nuk dihet se sa njerëz janë regjistruar për ADP që kur u bë i disponueshëm për klientët britanikë të Apple në dhjetor 2022.

Prof Alan Woodward – ekspert i sigurisë kibernetike në Universitetin Surrey – tha se ishte një “zhvillim shumë zhgënjyes” që përbënte “një akt të vetëdëmtimit” nga qeveria.

“Gjithçka që ka arritur qeveria e Mbretërisë së Bashkuar është të dobësojë sigurinë dhe privatësinë në internet për përdoruesit me bazë në Mbretërinë e Bashkuar”, tha Woodward. /Telegrafi/