Bislimoski: Problemi me faturat e larta të energjisë elektrike është tek EVN

Kryetari i KRRE-së, Marko Bislmoski thotë se problemi i faturave të larta të energjisë elektrike është te lexuesit e EVN-së, përcjell Telegrafi Maqedoni.

“Nëse periudha e leximit është 35 ditë, atëherë blloku i parë nuk është i barabartë me 210 kilovat orë, por 35 ditë me 7 kilovat orë në ditë është i barabartë me 245 kilovat orë. Është në rritje. Njësia e dytë nuk ka 630 kilovat, por 690-700 kilovat orë për 35 ditë. Sa më shumë të rritet periudha e leximit, aq më shumë rriten blloqet. Çdo qytetari i garantohen 7 kilovat orë për bllok të parë në ditë. Kjo shumëfishohet me numrin e leximeve dhe këtu qytetarët nuk dëmtohen”, tha sot kryetari i Komisionit Rregullator për Energjetik, Marko Bislimoski, lidhur me ankesat e disa qytetarëve për rritjen e faturave të energjisë elektrike.

Bislimoski thotë se ajo që duket nga faturat është se diku ka pasur një mbikëqyrje të konsumit nga furnizuesi universal dhe është e dukshme që ka gabime, sepse siç thotë ai, qytetarët nuk janë të kënaqur. Çështja është leximi.

“Nga dje kemi pranuar 99 ankesa për faturat e energjisë elektrike sivjet, kurse me shtatë të vitit të kaluar gjithsej 106 ankesa, ku qytetari ka kontaktuar EVN-në dhe kanë thënë se fatura është në rregull. Më pas qytetari e ankimon vendimin në KRRE dhe tashmë kemi filluar të marrim vendime”, tha Bislimoski në emisionin “Studio 10”.

Për 10 ditë, shton ai, kemi më shumë se 10 vendime dhe shumica janë pozitive për qytetarët dhe EVN Home është porositur t’i korrigjojë. Kryetari i KRRE-së shtoi se teknikisht është e pamundur që EVN t’i kontrollojë të gjithë njehsorët dhe për këtë arsye konsumi po mbivlerësohet./Telegrafi/