Presidenti argjentinas akuzohet për mashtrim mbi promovimin e kriptomonedhës

Presidenti i Argjentinës postoi në X rreth një tokeni digjital të quajtur $LIBRA pak para se të bie në treg.

Avokatët në Argjentinë kanë ngritur një rast mashtrimi kundër presidentit të vendit Javier Milei për promovimin e një kriptomonedhe, vlera e së cilës ra shpejt.

Udhëheqësi libertarian shkroi për një monedhë digjitale të quajtur $LIBRA në një postim në X të premten, transmeton Telegrafi.

Kriptomonedha kishte për qëllim “inkurajimin e rritjes ekonomike duke financuar bizneset e vogla dhe startup-et”, tha ai, përpara se të fshinte postimin e tij në mediat sociale disa orë më vonë.

Mesazhi i tij përfshinte një lidhje me një faqe interneti ku mund të merreshin monedhat digjitale.

Emri i domenit, vivalalibertadproject.com, është një referencë për një frazë të njohur që Milei përdor në fund të fjalimeve të tij, e cila përkthehet si “rroftë liria”.

Menjëherë pas postimit të Milei në X, vlera e $LIBRA, e cila u zhvillua nga KIP Protocol, ra, duke shkaktuar miliona dollarë humbje për investitorët, sipas ueb-faqes financiare Dexscreener.

Jonatan Baldiviezo, një nga avokatët që ngriti akuza kundër Mileit të dielën, pretendoi se ishte kryer “një numër i papërcaktuar mashtrimesh”.

Baldiviezo dhe kolegët e tij besojnë se mund të ketë pasur një “tërheqje qilimi”, një term i përdorur për të përshkruar një mashtrim kur zhvilluesit krijojnë një kripto token, tërheqin investitorët dhe më pas zhduken shpejt me të ardhurat.

“Brenda kësaj shoqërie të paligjshme, u krye krimi i mashtrimit, në të cilin veprimet e presidentit ishin thelbësore”, pohoi Baldiviezo, i cili gjithashtu akuzoi Milein për shkelje të ligjit të etikës publike.

Milei u dënua gjithashtu ashpër nga kundërshtarët e tij politikë, me ish-presidenten Cristina Kirchner që sugjeroi gjatë fundjavës se ai kishte vepruar si “grep” për një “mashtrim digjital”.

Ndërkohë, Esteban Paulón, një politikan i Partisë Socialiste, premtoi të nisë procedurat e shkarkimit të Mileit për incidentin.

“Vetëm për të qenë i qartë. Të hënën do të paraqesim kërkesën për shkarkimin e presidentit. Ajo që ka ndodhur është shumë e rëndë”, ka shkruar ai në rrjetet sociale.

Milei ka thënë se rivalët e tij politikë po përpiqen të përfitojnë nga episodi.

“Nuk isha në dijeni të detajeve të projektit dhe pasi u informova, vendosa të mos vazhdoj ta promovoj atë (kjo është arsyeja pse e fshiva postimin)”, tha ai.

Në një deklaratë të shtunën, Zyra e Presidentit tha se Zyra Kundër Korrupsionit e Argjentinës do të hetonte këtë çështje. /Telegrafi/