A janë vajrat esencialë vërtet të dëmshëm për lëkurën tonë? Ekspertët zbulojnë të vërtetën

Kur aplikohen siç duhet, disa prej tyre mund të kontribuojnë në pamjen e shëndetshme të lëkurës me vetitë e tyre qetësuese dhe regjeneruese

Vajrat esenciale janë ekstrakte shumë të përqendruara të marra nga bimët dhe pjesët e tyre si lulet, farat, gjethet, lëvorja e pemëve dhe rrënjët.

Ato janë përdorur për shekuj në mjekësinë bimore për vetitë e tyre antiinflamatore dhe antibakteriale.

Megjithatë, dermatologët dhe ekspertët e kujdesit të lëkurës shpesh paralajmërojnë kundër përdorimit të tyre. Mjeshtrja estetike dhe edukatore për markën e kujdesit organik të lëkurës LilFox, Mikaela MacLean, shpjegon:

“Vajrat esenciale mund të shkaktojnë reagime negative për disa arsye. Vetëm për shkak se diçka është natyrale nuk do të thotë automatikisht se është e sigurt – për shembull, dredhka helmuese është e natyrshme, por nuk është e sigurt për lëkurën. Gjithashtu, përqendrimi është i rëndësishëm: edhe nëse një vaj është i sigurt më vete, nëse nuk hollohet siç duhet ose nuk përfshihet në një formulë, mund të shkaktojë probleme. Për më tepër, disa përbërës që fillimisht tolerohen mirë mund të bëhen acarues nëse përdoren shumë shpesh”.

Lauren Busch, një infermiere dhe drejtore e edukimit lidhur me produktet në DoTerra, shton se reputacioni i keq i vajrave esenciale shpesh vjen nga përdorimi jo i duhur i tyre, transmeton Telegrafi.

Nëse përdorim vajra direkt në lëkurë pa i holluar ose nëse janë të cilësisë së dobët, mund të shkaktojnë acarim ose mbindjeshmëri. Kjo është arsyeja pse është e rëndësishme të zgjidhni vajra esenciale të cilësisë së lartë dhe të pastër dhe të ndiqni udhëzimet e rekomanduara të përdorimit”.

Çfarë përfitimesh mund të kenë vajrat esencialë për lëkurën?

Edhe pse ka kujdes rreth përdorimit të tyre, disa vajra esencialë mund të kenë efekte pozitive në lëkurë. Busch thekson se disa vajra, kur aplikohen siç duhet, mund të kontribuojnë në pamjen e shëndetshme të lëkurës me vetitë e tyre qetësuese dhe rigjeneruese.

Vajrat më të përdorur përfshijnë:

Pema e çajit – e njohur për vetitë e saj antibakteriale dhe anti-inflamatore, shpesh përdoret për të trajtuar aknet.
Livanda – qetëson dhe hidraton lëkurën, ideale për llojet e ndjeshme.
Temjani – ndihmon në rikthimin e lëkurës dhe zvogëlimin e dukshmërisë së plagëve.

MacLean shton se çelësi është përqendrimi i duhur. Nëse vaji nuk hollohet mjaftueshëm, mund të jetë irritues. Gjithashtu, disa vajra esencialë, si limoni, gëlqerja dhe agrumet e tjera, mund të jenë fototoksike dhe të shkaktojnë reaksione në diell, ndaj duhet të përdoren me kujdes.

A janë vajrat esencialë të sigurt për lëkurën e ndjeshme?

Përgjigja për këtë pyetje nuk është e thjeshtë, sepse çdo lëkurë reagon ndryshe. Nëse keni lëkurë të ndjeshme, është gjithmonë një ide e mirë që fillimisht ta provoni produktin në një zonë të vogël.

Busch rekomandon që ata me lëkurë të ndjeshme të zgjedhin vajra esencialë të butë si livanda dhe temjan, dhe t’i kombinojnë ato me vajra bartës si farat e rrushit, kërpi, trëndafili i egër ose fara e lulëkuqes. Këto vajra bartës mund të ndihmojnë në hollimin e vajrave esencialë dhe minimizimin e reaksioneve të mundshme.

Në fund, çelësi është informacioni dhe përdorimi i duhur. Nëse zgjedhim vajra cilësorë, i përdorim ato në përqendrimin e duhur dhe monitorojmë me kujdes reagimet e lëkurës sonë, vajrat esencialë mund të bëhen një shtesë e vlefshme për rutinën tonë të kujdesit të lëkurës. /Telegrafi/