Koalicioni për Familjen mban tubimin përmbyllës në Prishtinë

Koalicioni për Familjen ka mbajtur tubimin përmbyllës në Prishtinë, ku zyrtarë të koalicionit premtuan angazhimin për ruajtjen e vlerave të familjes tradicionale. Ata theksuan rëndësinë e familjes për zhvillimin e shoqërisë dhe të ardhmen e vendit.

Zyrtarë të koalicionit janë zotuar për angazhim dhe përkushtim të ruajtjes së vlerave të familjes tradicionale. Ata e kanë quajtur tubimin si falënderues, në formë të mirënjohjes së angazhimit të të gjithëve.

“Familja është garancë e shoqërisë, pa të s’mund të kemi të ardhme, shëndetësi, zhvillim ekonomik, as arsim e kulturë. Nuk mund të ketë vazhdimësi, pa familje nuk mund të ekzistojë as vendi, kombi e as njerëzimi. Andaj në këtë rrugëtim politik i cili buron nga ju, ky është fillimi, e që ky rrugëtim do të jetojë gjatë për aq sa jetojnë familjet shqiptare”, ka thënë prijësi i kësaj liste, Eman Rrahmani.

Ata kanë premtuar se do të punojnë për të jetësuar programin me 7 prioritete në fusha që prekin përditshmërinë e qytetarëve përfshirë ligjin për pensionet, ligjin për veteranët, dhe nevojën për zhvillim ekonomik më të qëndrueshëm.