Për herë të parë pas rënies së Assadit, udhëheqësi i ri sirian viziton Arabinë Saudite

Presidenti i përkohshëm i Sirisë ka bërë udhëtimin e tij të parë jashtë vendit drejt Arabisë Saudite, në një lëvizje që ka të ngjarë të jetë një përpjekje për të sinjalizuar largimin e Damaskut nga Irani si aleati kryesor rajonal.

Ahmed al-Sharaa, i cili dikur ishte në linjë me al-Kaedan, zbarkoi në Riad së bashku me ministrin e jashtëm të qeverisë së tij, Asaad al-Shaibani.

Dhe bëhet e ditur se të dy udhëtuan me një aeroplan saudit.

Televizioni shtetëror saudit i bëri jehonë faktit se udhëtimi i parë i Sharaa, i njohur fillimisht nga emri i luftëtarit Abu Mohammed al-Jolani, ishte në Riad.

Flamuri i ri i Sirisë me tre yje, trengjyrësh, valëvoi pranë atij të Arabisë Saudite në aeroport ndërsa Sharaa, me kostum dhe kravatë, doli nga aeroplani.

Ai ishte planifikuar të takonte princin e kurorës Mohammed bin Salman, sundimtarin de fakto të mbretërisë, gjatë udhëtimit.

Raportohet se Arabia Saudite ishte një nga vendet arabe që “derdhi” para në grupet kryengritëse që u përpoqën të rrëzonin ish-presidentin sirian, Bashar al-Assad, pasi protestat e Pranverës Arabe të Sirisë në vitin 2011 u kthyen në një goditje të përgjakshme.

Megjithatë, grupet e saj e gjetën veten në një pozitë jo të mirë, kur Assad, i mbështetur nga Irani dhe Rusia, e kundërshtoi revoltën në Siri, shkruan the Guardian, përcjell Telegrafi.

Por, kjo ndryshoi me ofensivën e rrufeshme të dhjetorit të udhëhequr nga Hayat Tahrir al-Sham (HTS) e Sharaa-s.

Grupi dikur ishte i lidhur me al-Kaedan, por ka deklaruar se ka shkëputur lidhjet e mëparshme.

Sharaa dhe HTS kanë menaxhuar me kujdes imazhin e tyre publik që atëherë, me presidentin e përkohshëm që favorizon një pamje ushtarake të ngjashme me atë të presidentit ukrainas, Volodymyr Zelensky.

Gratë janë emëruar në role dhe Sharaa është përpjekur të mbajë lidhje me popullsinë e krishterë dhe shiite alavite të Sirisë.

Kjo përfshin gjithashtu mbajtjen e Iranit dhe Rusisë kryesisht në distancë.

Irani ende nuk e ka rihapur ambasadën e tij në Damask, e cila kishte qenë një nyje kyçe në drejtimin e operacioneve përmes “boshtit të rezistencës” të vetë-përshkruar që përfshinte Sirinë e Asadit, milicinë e Hezbollahut të Libanit dhe partnerë të tjerë.

Rusia do të dëshironte të ruante aksesin në bazat ajrore dhe detare që ka në Siri, por pranoi Assadin kur ai u largua nga Siria.

Ndryshe, rindërtimi i vendit pas më shumë se një dekade lufte ka të ngjarë të kushtojë qindra miliarda dollarë, pa përmendur mbulimin e nevojave të popullit të Sirisë, miliona prej të cilëve mbeten të varfër.

Ministri i Jashtëm saudit, Princi Faisal bin Farhan, vizitoi Damaskun në janar dhe tha se Riadi ishte “angazhuar në mënyrë aktive në dialog” për të hequr sanksionet kundër Sirisë.

Arabia Saudite, ndryshe nga aleatët kryesorë të Sharaas në Turqi dhe Katar, rivendosi lidhjet me Assadin në vitin 2023 së bashku me pjesën më të madhe të botës arabe.

Ndërkohë, qeveria e përkohshme e Sirisë ende përballet me sfida nga grupi i Shtetit Islamik dhe militantët e tjerë në vend.

Të shtunën, një bombë shpërtheu në Manbij, një qytet në provincën e Alepos të Sirisë, duke vrarë katër civilë dhe duke plagosur nëntë të tjerë. /Telegrafi/