Kutia e Pandorës: Egli dërgon veten dhe Xumin në televotim kokë më kokë

Spektakli i Big Brother VIP Albania solli emocione dhe tensione, teksa Egli pati mundësinë të hapte “Kutinë e Pandorës”, një element që gjithmonë sjell përfitime, por edhe përgjegjësi të mëdha.

Brenda kutisë, Egli gjeti dy zarfa: një të bardhë dhe një të kuq.

Zarfi i bardhë i dha një surprizë të këndshme – një pushim relaksues që ajo do të përfitojë pasi të përfundojë eksperienca e saj në shtëpinë më të famshme të Shqipërisë.

Zarfi i kuq, nga ana tjetër, përmbante një vendim të rëndësishëm dhe delikat: Egli duhej të zgjidhte dy banorë për të shkuar në nominim kokë më kokë, përfshirë edhe mundësinë për të nominuar veten.

Pas një reflektimi të shkurtë, Egli mori një vendim që shokoi disa prej banorëve. Ajo vendosi të dërgonte në nominim Xumin dhe veten e saj.

Në arsyetimin e saj, Egli u shpreh se marrëdhënia me Xumin ishte bërë tepër e vështirë, pasi ai nuk e linte rehat, duke i bërë presion dhe duke e përndjekur për shkak të pëlqimit që ai kishte shprehur për të.

Kështu, në nominim për këtë javë shkojnë Egli dhe Xumi, një zhvillim që pritet të sjellë dinamika të reja dhe tensione në shtëpinë e Big Brother VIP Albania.

Tani mbetet në dorën e publikut të vendosë se kush do të vazhdojë lojën dhe kush do të largohet nga shtëpia. /Telegrafi/