Maqedonci në SHBA: Kosova do të ketë helikopterë ‘Black Hawk’

Ministri i Mbrojtjes, Ejup Maqedonci, në përmbyllje të vizitës në SHBA, e ka vizituar fabrikën “Sikorsky – Lockheed Martin”, ku prodhohen edhe helikopterët Black Hawk, që si thotë ai, Kosova do t’i ketë në flotën e mbështetjes ajrore të ushtrisë.

Maqedonci, në një postim në Facebook, bëri të ditur se me këtë rast kanë takuar menaxhmentin e kësaj kompanie, ku është diskutuar për opsionet e përfshirjes së helikopterëve në inventarin e Forcës së Sigurisë së Kosovës.

“Në përmbyllje të vizitës në ShBA, e vizitova fabrikën “Sikorsky – Lockheed Martin”, ku prodhohen helikopterë të ndryshëm, ndër të cilët edhe helikopterët Black Hawk, që do t’i kemi në flotën e mbështetjes ajrore të ushtrisë së Kosovës. Së bashku me Gjeneral Jasharin e takuam menaxhmentin e kësaj kompanie, ku diskutuam për opsionet e përfshirjes së helikopterëve në inventarin e Forcës së Sigurisë së Kosovës”, ka shkruar Maqedonci, transmeton Telegrafi.

Lexo po ashtu SHBA i jep dritën e gjelbër FSK-së për blerjen e helikopterëve

Ministri Maqedonci thotë se Kosova do te jetë më e sigurt me helikopterët që fluturojnë mbi qiellin e saj.

Gjatë qëndrimit në SHBA, ministri Maqedonci, bashkë me komandantin e FSK-së, gjenerallejtënant Bashkim Jashari, të martën janë pritur në takim nga Ndihmës Sekretari i Shtetit, Alexander Kasanof, në Departamentin e Shtetit.

Në njoftimin e Ministrisë së Mbrojtjes thuhet se gjatë takimit është ritheksuar vazhdimi i mbështetjes së diplomacisë amerikane në aspiratën e Kosovës për integrim në strukturat euro-atlantike.

Ata  janë pritur në takim edhe nga Ndihmës Sekretari i Mbrojtjes për NATO dhe Evropë, Alton Buland, në Departamentin e Mbrojtjes së Shteteve të Bashkuara. /Telegrafi/