Zjarret masive në Los Angeles – Kim Kardashian bën thirrje që të rritet paga e zjarrfikësve: Janë duke rrezikuar jetën e tyre

Kim Kardashian i bëri thirrje guvernatorit të Kalifornisë, Gavin Newsom, të rrisë pagën e zjarrfikësve që po luftojnë me zjarret shkatërruese në Los Angeles.

“Në të 5 zjarret në Los Angeles, ka qindra zjarrfikës të burgosur, që rrezikojnë jetën e tyre për të na shpëtuar”, shkroi ajo në Instagram.

“Ata janë në zjarrin Palisades dhe zjarrin Eaton në Pasadena duke punuar 24 orë. Ata nuk paguhen pothuajse asgjë, rrezikojnë jetën e tyre, disa kanë vdekur, për t’i dëshmuar komunitetit se kanë ndryshuar dhe tani janë reaguesit e parë. Unë i shoh ata si heronj”.

Ylli i “Kardashians” tha se zjarrfikësit e burgosur po paguhen një dollarë në orë për të “rrezikuar jetën e tyre” dhe kjo pagesë ka qenë e njëjtë që nga viti 1984.

Lexo po ashtu Të gjitha lajmet nga Kim Kardashian

“Kurrë nuk është ngritur me inflacion. Asnjëherë nuk është ngritur kur zjarret u përkeqësuan dhe shumë vdiqën”, ka shkruar ajo.

Kardashian, 44 vjeçe, tha se kishte një marrëveshje së fundmi për të rritur pagën e zjarrfikësve të burgosur në 5 dollarë në orë “por ajo u rrëzua në minutën e fundit”.

“Unë po i bëj thirrje [Newsom] të bëjë atë që asnjë guvernator nuk ka bërë në katër dekada dhe të rrisë pagën e zjarrfikësve të burgosur në një normë [që] nderon një qenie njerëzore që rrezikon jetën e tij për të shpëtuar jetën dhe shtëpitë tona”, vazhdoi nëna e katër fëmijëve. /Telegrafi/