Çfarë analizash mund të bëjmë në qendrat e mjekësisë familjare në Prishtinë, tregon drejtori i Shëndetësisë, Izet Sadiku

Drejtori i Shëndetësisë në Prishtinë, Izet Sadiku në podcastin “Shëndeti në rend të parë” ka folur lidhur me shërbimet laboratorike që ofrohen në disa qendra të mjekësisë familjare në Prishtinë.

Ai theksoi se në total janë diku rreth 30 parametra laboratorik i bëjnë në Prishtinë, e të cilat janë paraparë me udhëzim administrativ.

“Ne kemi rritur disa shërbime që janë shumë të rëndësishme për qytetarët, pasi kemi rritje të sëmundjeve kronike jo-infektive, siç janë sëmundjet kardio-vaskulare dhe diabeti.

Dhe për këtë arsye jemi fokusuar që analizat që i përcjellin këto gjendje me i rrit. Ne kemi punuar shumë që të bëhen edhe analizat që kanë të bëjnë me gjëndrat tiroide dhe diabetin, për arsye se konsiderojmë që janë dy sëmundje kogja të shpeshta dhe nëse duhet të përcjellët sëmundja ato duhet të bëhen rregullisht.

Dhe nëse bëhen çdo dy tre muaj kushtojnë 70-80 euro dhe qytetarët shpesh nuk kanë mundësi ta përcjellin gjendje e tyre për shkaqe financiare”, tha ai.

Sipas tij, T3, T4 dhe TSH dhe HbA1c që është diabetin bëhen në katër qendra të mjekësisë familjare, në Qendrën Kryesore të Mjekësisë Familjare, në qendrën e mjekësisë familjare në lagjen “Xhemajl Ibishi”, “Dardani” dhe në qendrën e Mjekësisë Familjare në “Breg të Diellit”.

Ai tha se ka rritje të kërkesave për analiza dhe se këto analiza mund të bëhen nga e hëna në të premten. /Telegrafi/