Bajrami reagon ndaj deklaratave të Muratit për të hyrat buxhetore: Inflacioni është faktor kryesor

Ish-ministrja e Financave, Hykmete Bajrami ka reaguar ndaj deklaratës së ministrit Hekuran Murati lidhur me të hyrat buxhetore, të cilat sipas Muratit kanë tejkaluar shifrën prej 3 miliardë euro.

Bajrami në një postim në Facebook ka shkruar se sa herë dikush flet për ekonominë e vendit tonë duke përjashtuar nga ekuacioni inflacionin, po thotë të pavërteta.

“Ministri, i cili në fillim të mandatit i’a rriti pagën vetës për rreth 45%, po tallet me qytetarët. Ai po lavdërohet se si i ka rritur të hyrat buxhetore dhe shpenzimet kapitale, por askund, asnjëherë nuk përmend inflacionin (rritjen e çmimeve), e cili vetëm në vitin 2022 ka qenë 11.6%, më i larti në historinë e pasluftës”, ka shkruar Bajrami.

Deputetja e LDK-së, ka renditur edhe disa fakte që sipas saj janë dëshmi që ka pasur rritje të çmimeve.

“E para: Në katër vitet e fundit ka pasur ngritje të çmimeve mesatarisht për 22%, ndërsa shporta e konsumit, për të cilën familjet shpenzojnë rreth 60% të të hyrave të tyre, është rritur me mbi 50%. Ky, pra, inflacioni është kontribuesi kryesor i rritjes së të hyrave buxhetore.

E dyta: Le të supozojmë se i arrini 600 milionë investimet kapitale në vitin 2024, por kur këto i indeksojmë për normën e inflacionit, që është 22% në kumulativ për katër vite, vlera reale e 600 milionëve është vetëm 468 milionë euro. Kjo do të thotë se investimet kapitale të vitit 2024, në terma realë, janë më të ulëta se ato në vitin 2018, që kanë qenë 530 milionë euro.

Lexo po ashtu Murati: Për herë të parë të hyrat buxhetore tejkalojnë shifrën 3 miliardë euro

E treta: Deri më 1 dhjetor, sipas serive kohore, investimet kapitale janë 444 milionë euro, pra mesatarisht 40 milionë euro për muaj. Për të arritur 600 milionë, duhet që në dhjetor të shpenzohen hiç më pak se 156 milionë euro. Si e shpjegoni ritmin e punëve në dhjetor që qenka rritur për tri herë e gjysmë në krahasim me muajt e mëparshëm. Apo, meqë është kohë fushate, do të shkoni me avance.

E katërta: Për shkak të mospunës së kësaj qeverie, struktura buxhetore ka ndryshuar shumë në disfavor të investimeve kapitale”, ka shkruar Bajrami.

Bajrami tutje ka shtuar se derisa në vitin 2016, 25% e buxhetit total ka shkuar në investime kapitale, dhe në vitin 2018 pjesëmarrja e investimeve kapitale ka qenë 27% në shpenzimet e përgjithame buxhetore, në vitin 2024 vetëm 17% e buxhetit total kanë shkuar në investime kapitale (1 janar – 1 dhjetor 2024), sipas serive kohore te Thesarit.

“Edhe njëherë: Për subvencione s’ka vend për lavdata, sepse nuk po bëni asgjë të jashtëzakonshme. Thjesht keni mbledhur tatime e taksa për ta bërë jetën e qytetarëve më të mirë dhe meqë keni dështuar, tani po ua ktheni qytetarëve një pjesë të parave të tyre”, ka shkruar Bajrami. /Telegrafi/