Evropa dënon dhunën në Gjeorgji, propozohet pezullimi i udhëtimit pa viza për diplomatë dhe zyrtarë

Komisioni Evropian ka propozuar pezullimin e udhëtimit pa viza për diplomatët dhe zyrtarët gjeorgjianë në përgjigje të shtypjes së dhunshme ndaj protestuesve, të cilët kanë dalë në rrugë prej javësh për të denoncuar largimin gradual të partisë në pushtet nga Evropa dhe drejt Rusisë.

Demonstratat, tashmë në ditën e tyre të 22-të, filluan në fund të nëntorit pasi kryeministri Irakli Kobakhidze njoftoi papritur se nuk do të ndiqte bisedimet e anëtarësimit në BE deri në vitin 2028, pavarësisht një detyrimi në Kushtetutë që detyron organet shtetërore të “marrin të gjitha masat brenda fushëveprimit të tyre për të siguruar integrimin e Gjeorgjisë.

Bëhet e ditur se shtypja e dhunshme e protestuesve pro-BE ka çuar në përleshje kaotike në rrugë, arrestime të figurave të opozitës, raportime të shumta për persona të plagosur dhe qindra arrestime, shoqëruar me akuza për rrahje, tortura dhe grabitje nga policia.

Zemërimi është shtuar nga një mori parregullsish që prishën zgjedhjet parlamentare të tetorit, të cilat panë partinë e Kobakhidzes të sigurojë një shumicë.

Më parë këtë javë, Përfaqësuesja e Lartë Kaja Kallas paraqiti propozimin e parë ndonjëherë për të sanksionuar zyrtarët gjeorgjianë përgjegjës për veprimet.

Por planit të saj iu vu veto nga Hungaria dhe Sllovakia, të cilët e denoncuan atë si ndërhyrje në punët e brendshme, shkruan euronews, përcjell Telegrafi.

Kallas, megjithatë, fitoi mbështetje të mjaftueshme për të pezulluar udhëtimin pa viza për diplomatët gjeorgjianë, i cili konsiderohet shumë më pak i fuqishëm se sanksionet.

“Është vetoja ime e parë hungareze, por mund të garantoj se nuk është e fundit”, tha Kallas.

Siç raportohet, propozimi i Komisionit kërkon vetëm miratimin e shumicës së cilësuar të shteteve anëtare, duke i hequr Hungarisë dhe Sllovakisë të drejtën e vetos.

Shtrirja e pezullimit është e kufizuar për mbajtësit e pasaportave diplomatike dhe të shërbimit, që do të thotë se vetëm ata që punojnë për institucionet shtetërore do të duhet të marrin vizë.

Shtetet anëtare kishin sinjalizuar më parë ngurrimin e tyre të fortë për të zbatuar kufizimin për popullatën e përgjithshme, nga frika e efekteve negative për ata që protestojnë në rrugë.

“Lehtësimet e vizave si koha më e shkurtër e aplikimit, tarifat më të ulëta dhe kërkesa për të paraqitur më pak dokumente mbështetëse, gjithashtu nuk do të zbatohen më për mbajtësit gjeorgjianë të pasaportave diplomatike dhe zyrtare”, tha Komisioni në një njoftim për shtyp.

Zbatimi i masës do të varet nga autoritetet kombëtare në frymën e “bashkëpunimit të sinqertë”, vuri në dukje ekzekutivi, në atë që lexohet si një paralajmërim për Hungarinë dhe Sllovakinë.

Ndryshe, gjeorgjianët kanë shijuar udhëtimin pa viza në bllok që nga viti 2017, si pjesë e një qasjeje strategjike për të thelluar lidhjet me fqinjësinë lindore, e cila vlen edhe për Moldavinë dhe Ukrainën.

Si rezultat, shtetasit e Gjeorgjisë mund të hyjnë në Zonën Shengen dhe të qëndrojnë për 90 ditë pa telashet e aplikimit për vizë.

Por në muajt e fundit, veprimet e partisë në pushtet, Georgian Dream, kanë vënë në dyshim respektimin e kërkesave bazë të vendit për të gëzuar një përfitim të tillë. /Telegrafi/