Berisha me akuza të forta ndaj Blinken: Sekretari i Shtetit u angazhua në një grusht shteti në Shqipëri

Kreu i Partisë Demokratike Sali Berisha ka ngritur sërish akuza të forta ndaj administratës Biden dhe konkretisht ndaj Sekretarit Amerikan të Shtetit, Antony Blinken, të cilin e akuzon për grusht shteti në Shqipëri.

Berisha tha se “drama shqiptare, aq sa është shqiptare, aq është sorosiane, aq është edhe amerikane. Kurrë nuk duhet të kemi frikë ne të themi të vërtetën”

“Asnjë komb tjetër në histori nuk ka derdhur gjak sa kombi amerikan për lirinë e kombeve të tjera.

Asnjë komb tjetër nuk ka kontribuar në lirinë e shqiptarëve sa kombi amerikan. Por ky komb ka pasur edhe në të shkuarën e tij njollat e zeza të grushteve të shtetit. Historia tregon se rrëzimi i Mosadekut në Iran ishte një nga gabimet më të mëdha historike që u bë, dhe u rrëzua nga shërbimet e fshehta anglo-amerikane. Ky nuk është i vetmi grusht shteti.

Në Shqipëri, Sekretari i Shtetit, administrata u angazhua në një grusht shteti. Shpesh i shoh njerëzit që kur e dëgjojnë këtë fjalë, habiten. Jo, është e vërtetë kjo. Dhe prapë, një mijë herë do e shpjegoj.

Sovraniteti i një vendi është i jashtëm, ka integritetin territorial, pavarësinë. Por është edhe i brendshëm. Sovraniteti i jashtëm është shkretëtirë nëse kombet nuk kanë edhe sovranitetin e brendshëm.

Në diktaturë nuk ka sovranitet të brendshëm. Ka sovran që ka të gjithë pushtetin në duart e tij”, tha Berisha. /Telegrafi/