“Dua të lë futbollin dhe të luaj golf, por nuk mundem” – Guardiola deklaron se nuk do të drejtojë klub tjetër pas Man Cityt

Pep Guardiola është një nga trajnerët më të mirë të futbollit ndonjëherë. Me Barcelonën, Bayern Munich dhe Manchester Cityn fitoi 39 trofe dhe tre herë u shpall trajneri më i mirë në botë.

Ai është në klubin nga Mançesteri që nga viti 2016, ndërsa tani po kalon një nga periudhat më të vështira në karrierën e tij.

Në Ligën Premier janë në vendin e katërt me tetë pikë më pak se Liverpooli kryesues, i cili ka edhe një ndeshje më pak, ndërsa në Ligën e Kampionëve është i 17-ti me 8 pikë.

Man City ishte në një seri prej shtatë ndeshjesh radhazi pa fitore, ndaj filloi të vihej në pikëpyetje nëse ishte koha që Guardiola të largohej. Megjithatë, ai e zgjati kontratën deri në vitin 2027.

Në emisionin Desmontadito të prezantuesit Danij Garcia, ai pranoi se do të përfitonte nga një pushim nga futbolli.

“Dua të lë futbollin dhe të luaj golf, por nuk mundem. Do të vijë një kohë kur do të ndihem mjaftueshëm dhe atëherë do të ndalem patjetër. Nuk do të drejtoj një ekip tjetër. Nuk po flas për një periudhë afatgjatë. Të ardhmen, por nuk do të largohem nga Manchester City dhe të shkoj në një vend tjetër për të bërë të njëjtën gjë si tani”.

“Nuk do të kisha energji për këtë, jam ende këtu. Mendimi për të shkuar diku tjetër, me procesin e stërvitjes dhe gjithçka tjetër… Jo, jo, jo. Ndoshta do të drejtoja kombëtaren, por ajo është ndryshe”.

“Unë duhet të ndalem, si ata shefat e kuzhinës që shkojnë në vende të tjera, të ndalem dhe të shoh se çfarë kam bërë mirë dhe çfarë mund të bëj më mirë. Kur je i zënë gjatë gjithë ditës, nuk ke kohë për këtë. Një pushim do të më bënte mirë”, deklaroi Guardiola, duke theksuar se golfi është “një nga terapitë më të mira” për të. /Telegrafi/