Edhe zyrtarisht, Lumbardh Salihu kandidat për deputet në zgjedhjet e ardhshme qendrore të Kosovës

Tashmë është zyrtare që edhe Lumbardh Salihu, fituesi i edicionit të dytë të Big Brother VIP Kosova, do të jetë kandidat për deputet në zgjedhjet e ardhshme qendrore të Kosovës, të cilat do të mbahen më 9 shkurt 2025.

Pak javë më parë, Lumbardhi kishte njoftuar se kishte aderuar në Lidhjen Demokratike të Kosovës (LDK), parti e cila të mërkurën, publikoi listën e plotë të kandidatëve për deputet, në mesin e të cilëve figuron edhe emri i Lumbardhit.

Lumbardh Salihu, i njohur për publikun shqiptar për rrugëtimin e tij në industri të ndryshme, ka nisur karrierën si futbollist, për të kaluar më pas në modeling.

Megjithatë, ai e mori hovin më të madh të famës gjatë pjesëmarrjes në Big Brother VIP Kosova, ku shkëlqeu dhe arriti të fitojë edicionin e dytë të këtij spektakli. Pas këtij suksesi, ai ka kaluar nga fama televizive në një dimension të ri, atë të angazhimit politik, duke u bërë një kandidat i LDK-së për të përfaqësuar qytetarët e Kosovës në Kuvendin e Kosovës.

Në një moment kur interesimi për rinovimin e politikës kosovare është i madh, Lumbardhi ka fituar mbështetje nga disa grupe të ndryshme shoqërore, sidomos nga ata që e konsiderojnë si një figurë të re dhe dinamike. /Telegrafi/