Barcelona merr një fitore komode në shtëpi ndaj Brest

Barcelona ka shënuar fitore me rezultat 3-0 në shtëpi ndaj Stade Brest në kuadër të raundit të pestë në Ligën e Kampionëve.

Fillimi i ndeshjes pati një ritëm të qetë, me Barcelonën që po dominonte kryesisht në aspektin e posedimit të topit dhe me Brest që po mbronte hapësirat në mbrojtje.

Në minutën e nëntë, Barcelona fitoi penallti për shkak të një ndërhyrje të palejueshme nga portieri Marc Bizot.

I saktë nga pika e bardhë u tregua Robert Lewandowski i cili shënoi për rezultatin 1-0.

Historic. pic.twitter.com/af5IBzehXQ

— FC Barcelona (@FCBarcelona) November 26, 2024

Blaugranasit e nisën më hov pjesën e dytë, duke rrezikuar seriozisht portën mysafirë në minutën e 54-të me Fermin Lopez i cili për pak sa nuk realizoi golin e dytë.

Megjithatë, goli i dytë erdhi në minutën e 66-të përmes Dani Olmos i cili realizoi për 2-0 pas asistimit të Gerard Martin.

Për epilogun përfundimtar të takimit u përkujdes Robert Lewandowski i cili realizoi për 3-0 në minutën e 92-të pas asistimit të Alejandro Baldes.

Me këtë fitore Barcelona ngjitet momentalisht në pozitën e dytë në renditje me 12 pikë të grumbulluara.

Ky triumf ishte i rëndësishëm për ekipin e Hansi Flick pasi ata tashmë u rikthyen tek rezultatet pozitive pasi kishin dy ndeshje radhazi pa e shijuar atë./Telegrafi/