Rusia emëron komandantin e ri pasi i mëparshmi u shkarkua për “gënjeshtra për përparimin e luftës” në Ukrainë

Rusia ka vendosur një komandant të ri për grupin e saj jugor të forcave në Ukrainë pasi paraardhësi i tij u shkarkua.

Gjeneral-lejtnant Alexander Sanchik do të marrë përgjegjësinë si ushtrues detyre i komandantit të grupit të betejës, shkruajnë mediat e huaja, përcjell Telegrafi.

Ai zëvendëson gjeneralkolonelin Genadi Anashkin, i cili u shkarkua mes raporteve se Kremlini ishte lodhur nga “gënjeshtra” e tij për përparimin e luftës.

Disa blogerë ushtarakë rusë theksuan se ish-komandanti u kishte thënë vazhdimisht figurave të ministrisë së mbrojtjes se kishte marrë vendbanime që ishin ende nën kontrollin e Ukrainës.

Ata pretendojnë se raportet e rreme të bëra nga disa komandantë për situatën në terren kanë çuar në humbje të mëdha midis njësive ruse.

Blogerët ushtarakë janë bërë një burim kyç informacioni që nga fillimi i plotë i agresionit rus në Ukrainë në shkurt 2022.

Shumë prej tyre kanë burime të thella brenda forcave të armatosura të shtetit ose midis separatistëve pro-rusë në Ukrainën lindore. /Telegrafi/