Ronaldo pret në intervistë YouTuber-in e famshëm MrBeast, e pyet se a frikohet që futbollisti do t’ia kalojë me shikueshmëri

Një nga surprizat më të përfolura të Cristiano Ronaldos së fundmi ishte shfaqja e tij përkrah YouTuber-it të famshëm MrBeast (Jimmy Donaldson).

Të dy personalitetet më të njohura në botën e sportit dhe krijimit të përmbajtjes në internet u bashkuan për një video me titullin provokues: “Takova MrBeast për të thyer internetin”. Ky bashkëpunim nuk kaloi pa zhurmë, duke tërhequr vëmendjen e fansave dhe miliona shikime brenda pak orësh.

Gjatë videos, Ronaldo dhe MrBeast diskutuan një gamë temash interesante, përfshirë suksesin e tyre në internet. MrBeast, i cili ka mbi 320 milionë ndjekës në kanalin e tij kryesor në YouTube, ndau këshilla për Ronaldon mbi përmirësimin e kanalit të tij të sapokrijuar në platformë, edhe pse ylli portugez tashmë numëron afërsisht 70 milionë abonentë.

Në një moment me humor, Ronaldo pyeti: “A ke frikë se mund të të tejkaloj?”, duke iu referuar suksesit të tij të shpejtë në YouTube. Donaldson u përgjigj me një ton miqësor: “Të jem i sinqertë, prisja të arrije 20-30 milionë ndjekës në muajin e parë, por kur pashë numrin 60 milionë, mbeta i habitur”.

Në bisedën e tyre, MrBeast e pyeti Ronaldon se si ndihet si njeriu më i ndjekur në botë. “Është një arritje e mirë, por jo surprizuese,” tha Ronaldo. “E di pasionin që njerëzit kanë për mua dhe për futbollin.” Ata gjithashtu diskutuan mundësinë që Ronaldo të luajë një ditë përkrah djalit të tij, Cristiano Jr., me Ronaldon që la gjithçka të hapur: “Do të shohim, ai është vetëm 14 vjeç”.

MrBeast, përveçse është krijuesi më i ndjekur në botë, ka ndërtuar një imperium nga videot e tij inovative dhe sfiduese. Vetëm gjatë vitit të fundit, videot e tij kanë grumbulluar miliarda shikime, ndërsa ai ka fituar mbi 85 milionë dollarë falë përmbajtjes, linjave të produkteve dhe sponsorëve.

View this post on Instagram

A post shared by MrBeast (@mrbeast)

Në të kaluarën, disa nga videot e tij janë përfshirë në polemika për kushtet e xhirimit, si dhe për incidentet që ndodhën gjatë filmimeve në vende të ndryshme, përfshirë Kroacinë. Megjithatë, karriera e tij vazhdon të ngjitet dhe të frymëzojë miliona njerëz globalisht.

Ronaldo e nisi kanalin e tij të quajtur UR Cristiano në gusht të këtij viti, dhe ai tashmë është një nga kanalet më të ndjekura në YouTube. Ky bashkëpunim me MrBeast premton të jetë fillimi i shumë projekteve të reja për yllin portugez në botën dixhitale. /Telegrafi/