Ku qëndrojnë Rusia dhe Ukraina, 1000 ditë pas fillimit të luftës mes tyre?

Ndërsa lufta në Ukrainë po kalon 1000 ditë, Sky News hedh një vështrim në situatën në të dyja palët dhe ato që mund të vijë më pas.

Gati tri vjet që kur Rusia e Vladimir Putinit filloi agresionin mbi Ukrainë, konflikti vazhdon të konsumojë sasi të mëdha armatimi dhe të marrë jetë njerëzish.

Dhe sulmet e mëdha me raketa dhe dron vazhdojnë të synojnë infrastrukturën kryesore të energjisë në Ukrainë dhe të marrin jetën e civilëve.

Duke folur për Sky News, eksperti i mbrojtjes dhe ushtaraku, Simon Diggins dhe John Foreman, ish-atasheu i mbrojtjes i Mbretërisë së Bashkuar në Moskë dhe Kiev, diskutojnë se ku qëndrojnë aktualisht Ukraina dhe Rusia ushtarakisht dhe si mund të duken 1000 ditët e ardhshme të konfliktit, përcjell Telegrafi.

Cila është situata aktuale në fushën e betejës?

Kur tanket hynë në Ukrainë në shkurt të vitit 2022, qëllimi i Rusisë ishte të shkatërronte qeverinë aktuale dhe ta kthente Ukrainën në një vend “që fokusohej” kah Moska, jo Perëndimi, thotë Simon Diggins.

Pavarësisht se deri më tani ka dështuar në arritjen e këtij qëllimi, Diggins thotë se vendi ku Rusia ka pasur sukses është konsolidimi i kontrollit mbi një “sasi të konsiderueshme” të Ukrainës lindore.

“[Provincat lindore] përfshijnë shumë fuqi industriale të Ukrainës dhe ofrojnë një urë tokësore për në Krime, të cilën rusët e pushtuan në vitin 2014”, thekson Diggins.

Diggins shton se për sa i përket pozicionit të tyre ushtarak, trupat ruse po vazhdojnë të përparojnë, megjithëse shumë ngadalë.

Në anën tjetër, inkursioni ukrainas në rajonin e Kurskut të Rusisë mund ta ketë zënë Moskën në befasi, por ai “nuk e ndryshoi trajektoren e luftës” në favor të Ukrainës, thotë zoti Foreman.

“Ukraina ka arritur një fitore strategjike, ndoshta më e rëndësishmja nga të gjitha, që është, ajo është e pavarur dhe e orientuar nga perëndimi”, vlerëson analisti ushtarak.

“Por kjo ka ardhur me një kosto – dëme të konsiderueshme në infrastrukturë”.

Çfarë burimesh ka secila palë?

Të dielën, presidenti Joe Biden autorizoi Ukrainën që të fillojë të lëshojë raketa të furnizuara nga SHBA në thellësi të Rusisë, që do të thotë se ata do të jenë në gjendje të përdorin sistemet raketore taktike të ushtrisë (ATACMS) për sulme me rreze të gjatë.

ATACMS kanë një rreze veprimi deri në 300 kilometra, por Foreman thotë se ato nuk do ta ndihmojnë Ukrainën të ndjekë aeroplanët rusë që po kryejnë sulme ajrore kundër shumë prej qyteteve të saj.

“Rusia ka përdorur çdo armë në arsenalin e saj për të provuar të përfitojë”, thotë ai, duke përmendur edhe dronët iranianë.

Diggins thotë se llojet e armëve që Ukraina mund të përdorë tashmë – për të goditur objektivat ruse brenda kufijve të saj – janë raketat “Storm Shadow” të Mbretërisë së Bashkuar dhe raketat homologe të saj franceze, SCALP.

Ukraina tani po kërkon raketa me rreze të gjatë dhe sisteme efektive të mbrojtjes ajrore – të cilat mund të përfshijnë raketën gjermane Taurus, shton Diggins.

Ndryshe, SHBA-ja lehtësoi kufizimet në përdorimin e ATACMS pasi Rusia filloi vendosjen e trupave tokësore të Koresë së Veriut për të plotësuar forcat e veta në konflikt.

Kur u pyet për vendosjen e trupave të Koresë së Veriut, Diggins thotë se është një “zhvillim shqetësues”, por parashikon sfida për Rusinë në afat të gjatë nëse vazhdon të përdorë ushtarë të huaj.

“Ata janë ndoshta të gjithë të disiplinuar, por nuk kanë pasur ndonjë përvojë të vërtetë konflikti”, thekson ai, duke shtuar: “Unë mendoj se rusët nuk do të duan të duken se janë tepër të varur prej tyre”.

“Ka një sfidë me përdorimin e ushtarëve të njerëzve të tjerë në luftimet tuaja. Ju i vendosni ato [trupat e Koresë së Veriut] kundër anës moderne perëndimore, që janë tani ukrainasit, dhe ata mund të përfundojnë me shumë viktima”.

Si mund të duken 1000 ditët e ardhshme?

Të dy ekspertët parashikojnë “një fund të çrregullt” të konfliktit në vitin e ardhshëm, ku asnjëra palë nuk ka arritur deri tani përfitime të rëndësishme.

“Në Evropë dhe SHBA [pavarësisht se kush e fitoi presidencën] ka një përpjekje për të parë përfundimin e luftës, ndoshta me ndonjë kompromis të çrregullt”, thotë zoti Foreman.

Diggins parashikon se një formë e armëpushimit ka të ngjarë të vijë në gjashtë deri në nëntë muajt e ardhshëm, me një lloj marrëveshjeje “shkëmbim toke për paqe”.

“Pika tjetër e ndërlikuar është nëse Perëndimi do të mbështesë Ukrainën”, vë në pah ai.

Diggins shton: “Unë dyshoj se Ukraina do të arrijë anëtarësimin e shpejtë në NATO. Një nga kushtet që Putinit do t’i duhet për të rënë dakord për një armëpushim do të jetë që ata të mos jenë zyrtarisht pjesë e NATO-s”. /Telegrafi/