Samiti i G20 në Brazil – çfarë është në agjendë dhe pse ka rëndësi?

Udhëheqësit nga ekonomitë më të mëdha të botës janë mbledhur në Brazil për samitin e G20 që filloi të hënën.

Dhe ndërsa vendet debatojnë për strategjitë e politikave globale, atyre do t’u duhet të marrin parasysh sfida të tilla si administrata e ardhshme e Donald Trump në Shtetet e Bashkuara, lufta e Izraelit ndaj Gazës dhe lufta në Ukrainë.

Çfarë është samiti i G20?

Grupi i 20 (G20) është një bllok i 19 prej ekonomive më të mëdha të botës dhe Bashkimit Evropian. Bashkimi Afrikan gjithashtu u bashkua në vitin 2023.

Vendet anëtare janë Argjentina, Australia, Brazili, Kanadaja, Kina, Franca, Gjermania, India, Indonezia, Italia, Japonia, Meksika, Rusia, Arabia Saudite, Afrika e Jugut, Koreja e Jugut, Turqia, Britania e Madhe dhe SHBA. Spanja është pjesë e G20 si mysafire e përhershme.

G20 u formua në vitin 1999 në vazhdën e krizave të shumta ekonomike, duke përfshirë krizën financiare aziatike të vitit 1997.

Ai u formua për të diskutuar çështjet e politikës.

Që nga fillimi i tij, grupi është takuar çdo vit për një samit vjetor. Në vitin 2023, India priti samitin ndërsa samiti i vitit 2022 u mbajt në Indonezi.

Samiti do të zhvillohet të hënën dhe të martën në qytetin bregdetar të Brazilit, Rio de Zhaneiro, përcjell Telegrafi.

Kush po merr pjesë?

Udhëheqësit nga 19 vendet anëtare, BE dhe Bashkimi Afrikan po marrin pjesë në samit.

Presidenti amerikan në largim Joe Biden do të bëjë paraqitjen e tij të fundit përpara se të largohet nga detyra më 20 janar.

Narendra Modi i Indisë dhe Xi Jinping i Kinës mbërritën në Rio de Zhaneiro të hënën për të marrë pjesë në samit, sipas raporteve të mediave.

Presidenti turk Rexhep Tajip Erdogan mbërriti në Brazil të dielën pasdite dhe pati një takim me presidentin e majtë të Brazilit, Luiz Inacio Lula da Silva.

Për presidenten meksikane Claudia Sheinbaum, ky do të jetë samiti i parë ndërkombëtar që nga marrja e detyrës në tetor.

Më 18 tetor, Putin tha se nuk do të merrte pjesë sepse prania e tij do të “shkatërronte” samitin me “biseda” që mund të silleshin rreth një urdhër-arresti të Gjykatës Ndërkombëtare Penale (ICC) kundër tij për krime të dyshuara lufte në Ukrainë.

Njoftimi i tij erdhi pasi Ukraina i kërkoi anëtarit të ICC Brazilit të arrestonte Putinin nëse ai udhëtonte atje për samitin.

Çfarë është në agjendën e G20 këtë vit?

Përveç diskutimeve të gjera mbi zhvillimet makroekonomike, ekspertët parashikuan që samiti i këtij viti do të fokusohej në zhdukjen e urisë, e cila është një prioritet për Brazilin, raportoi agjencia e lajmeve Associated Press.

Brazili po kërkon të nisë një Aleancë Globale Kundër Urisë, me programe sociale dhe mekanizma financimi që synojnë adresimin e mungesave dhe furnizimeve globale të ushqimit.

Diskutimet gjithashtu pritet të ndërlikohen nga ndryshimet e mprehta të politikave të Uashingtonit nën Trump, i cili do të marrë detyrën pas nëntë javësh.

Qëndrimi i Trump për rritjen e tarifave dhe heqjen graduale të mbështetjes amerikane për luftën në Ukrainë ka të ngjarë të sfidojë marrëveshjet ndërkombëtare për këto çështje.

Pse ka rëndësi G20?

Shtetet anëtare të G20 janë përgjegjëse për 85 për qind të prodhimit ekonomik global, sipas të dhënave të Bankës Botërore.

Rëndësia e grupit qëndron në përfaqësimin e tij të gjerë, ndryshe nga Grupi i Shtatë (G7), i cili është i kufizuar në kombet më të pasura.

Megjithëse përfshirja e fundit e Bashkimit Afrikan në G20 e ka lehtësuar këtë përfaqësim më të gjerë, arritja e një konsensusi midis një grupi kaq të larmishëm ka qenë e vështirë.

Ekspertët thanë gjithashtu se aftësia e G20 për të drejtuar veprime të koordinuara është dobësuar vitet e fundit, veçanërisht gjatë pandemisë COVID-19 kur kishte një përgjigje më të fragmentuar.

Një nga sukseset e saj më të mëdha para kësaj ishte në menaxhimin e krizës financiare të vitit 2008 duke rënë dakord për 4 trilionë dollarë në masa stimuluese, duke mënjanuar barrierat tregtare dhe duke miratuar reforma të sistemeve financiare.

Për më tepër, takimet dypalëshe në margjinat e samitit kanë çuar herë pas here në marrëveshje të mëdha ndërkombëtare. /Telegrafi/