SHBA-ja sanksionon kompanitë kineze që prodhojnë armë për luftën e Rusisë në Ukrainë

SHBA-ja ka vendosur sanksione ndaj dy furnizuesve të dronëve me bazë në Kinë dhe partnerëve të tyre të dyshuar rusë, hera e parë kjo që ka penalizuar kompanitë kineze për furnizimin e sistemeve të armëve të Rusisë për luftën e saj në Ukrainë.

Bëhet e ditur se Uashingtoni ka akuzuar prej kohësh Kinën për mbështetjen e përpjekjeve luftarake të Rusisë duke furnizuar mallra dhe komponentë me përdorim të dyfishtë, gjë që Pekini e mohon.

Por, në një njoftim të enjten, Departamenti Amerikan i Thesarit akuzoi kompanitë kineze për përfshirje të drejtpërdrejtë në furnizimet me armë në Moskë.

Kompanitë kineze kanë bashkëpunuar me kompanitë ruse të mbrojtjes në prodhimin e mjeteve ajrore pa pilot me rreze të gjatë”, deklaroi departamenti.

Siç raportohet, dronët janë projektuar, zhvilluar dhe prodhuar në Kinë përpara se të dërgoheshin në Rusi për përdorim në fushën e betejës, shkruan CNN, përcjell Telegrafi.

“Ndërsa Shtetet e Bashkuara vendosën më parë sanksione ndaj subjekteve kineze që ofrojnë të dhëna kritike për bazën ushtarako-industriale të Rusisë, këto janë sanksionet e para të vendosura ndaj subjekteve që drejtpërdrejt zhvillojnë dhe prodhojnë sisteme të plota armësh në partneritet me firmat ruse”, shtoi departamenti.

Deklarata akuzoi Xiamen Limbach Aircraft Engine Co., me bazë në qytetin bregdetar të Xiamen, për prodhimin e motorëve të dronëve për serinë Garpiya.

SHBA-ja gjithashtu akuzoi kompaninë tjetër kineze të sanksionuar, Redlepus Vector Industry Shenzhen Co., se punon me një kompani ruse të mbrojtjes për të lehtësuar dërgimin e dronëve në Rusi.

Departamenti i Thesarit tha se Redlepus kishte dërguar gjithashtu dërgesa në Rusi të komponentëve që mund të përdoren në drone, duke përfshirë motorët e aeroplanëve, pjesë të makinerive të përpunimit automatik të të dhënave dhe komponentët elektrikë përmes kompanisë ruse të mbrojtjes TSK Vektor.

SHBA-ja vendosi masa ndëshkuese edhe ndaj pronarit të TSK Vektor, një shtetas rus, dhe një kompanie tjetër që ai zotëron. /Telegrafi/